Freespace: studenc a la Bienala de Unejia!

Data

15 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Trei clasc del lizeo scientifich à vijità una de la mostres de maor prestije del mond

La Bienala de Unejia l’é una de la rassegnes de èrt contemporèna del mond più de nonzech e de età. En mercol ai 24 de otober la classes terza, quarta e quinta del lizeo scientifich de la Scola Ladina de Fascia les é jites a ge dèr na veièda. E dassen grana l’é stat la marevea de duc i studenc.

La Bienala é nasciuda del 1895 per sostegnir l’èrt de Unejia e de duta la Tèlia. L’é stat la pruma esposizion bienala d’èrt del mond, la se à cruzià e la se cruzia de portèr en aut la beleza de l’èrt tras l’organisazion de manifestazions internazionèles e la promozion de la neva tecniches artistiches.

Te l’ambit de la Bienala vegn organisà desferenta autra mostres: a partir dal chino, la musega e l teater, fin a ruèr a l’architetura, l bal e la pitura.

I studenc, più tel spezifich, é jic a descorir la sedejeisema mostra internazionèla de architetura. Dal titol “Freespace” e curèda da Yvonne Farrell e Shelley McNamara, la é stata averta ai 26 de mé e la se serarà sù ai 25 de november. L’à chest titol percheche l’obietif de chesta edizion l’é l’atenzion envers l spazie, la calità de chest post, del spazie ledech e debant. Freespace vel dir che un di ponc de referiment de l’architetura cogn esser ence la “no architetura”. La mostra é stata metuda a jir anter l Pavion Zentrèl ai Vidores, a l’Arsenal e tel zenter storich de Unejia, tolan ite 71 partezipanc. Te chesta edizion à tout pèrt ence 6 neves paìjes, anter chisc, Antigua & Barbuda, Arabia Saudita, Guatemala, Libano, Pakistan e Vatican (chest con sie pavion su l’ìsola vejin la Piaza de Sèn March de Sèn Gere Maor).

De più su la Usc nr 44 stampèda ai 9 de november

 (Nicoletta Riz )