A Madrid... spetan New York!

Data

16 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N bel grop de feruscoi conscric del 1964 é stat a se fèr n bel fin de setemèna te la capitala de la Spagna

Engaissé dò cater egn zenza sia raides, n bel grop de na ventina de conscric del 1964 i se à conzedù chest an n lonch fin de setemèna dai 26 ai 28 de otober te na zità che à n muie de marevees, ma ence n bon nonzech per sia “movida”: Madrid.

Peé via da la 1 de net, con Ryanair da Bergamo da doman i era jà te la capitala de la Spagna, giusta en temp per n bon dalesnef con pan e jamon madrilen e na bona cerveza.

Vidé da na guida, l grop à podù prum de dut veder coran la Plaza de Toros... e dezider che la meritèa na vijita più a fon. Dapò i se à empienì i eies con l beliscim Palacio Real, e dò l venter con na bona marena de tapas te n belot local apede a l’hotel... olache zachei che ge encrescea dò so lurier l’à ence podù fèr l camerier!

L domesdì l’é sgolà en legreza a la descorida del muion de pìcoi locai che viventea la vita de Madrid, anter na bira e na sangrìa... giusta per se enjignèr al shopping, che à frutà ence 2 pé de stivalec de goma resa dassen trendy... soraldut se scambié per n’aer un per color!

La sabeda l’é stat l temp de ge dèr maor lèrga a la cultura, con la vijita al Museo de El Prado, olache tropes i é resté encanté a vardèr i chèdres maraveousc de Goya, Caravaggio, Velasquez. Duc i à podù veder La Plaza Mayor e autra belezes de la zità, dant de fenir la sera en legreza a ritm del flamenco con na gustegola compagnìa.

La domenia no l’é mencià na bela veduda de Madrid da l’aut de la torn panoramica e ence la vijita a la Plaza de Toros de Las Ventas, la maor arena de duta la Spagna, che l grop de fascegn à podù se studièr fora vidé da la descrizions travers la cufies.  

L grop à dapò podù se conzeder amò na bela raida fora per i locai de la zità, a cercèr spezialitèdes tipiches del post: no podea mencèr la raida tel Mercado San Miguel e chi più golousc i à volù meter l nès ence te la conditorìa de maor nonzech de Madrid, La Mallorquina.

Pecià che dapò l’é stat tost ora de se endrezèr a vegnir de retorn.

L develpai de cher a la organisadores Antonella e Luisa l’é semper de obligh, segures che n auter an, per i 55, sarà... n’autra più bela, e zenza desmentièr che, coche ne à dit vèlch feruscola conscrita: “New York ne speta semper...”!

 ((lg))