L’é mingol fascian l prum fioch resa de Ciavaleis

Data

06 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En mercol ai 5 de dezember tel partiment de nasciuda giusta avert l’é vegnù adalèrch na beza e n bez. Da doman bonora l’é nasciù Nives, enciasèda a Pardac ma fia del moenat Andrea Felicetti e de Federica Cavallin.
La sodesfazion percheche en sabeda prum de dezember l partiment de nasciuda de l’ospedèl de Ciavaleis l’à endò podù vegnir avert l’é doventà legreza piena en mercol ai 5, canche jà da doman bonora i à podù tachèr sù l prum fioch, de color resa. L’é nasciù Nives, na pìciola enciasèda con sia familia a Pardac ma fia de n moenat, l forestal Andrea Felicetti e de Federica Cavallin de naa veneta ma cognosciuda chiò soraldut desche artista: l’à realisà anter l’auter la statua del sudà de la gran vera loghèda te Piaz de Ramon a Moena. 

Federica l’aea l termen ai 3 de dezember, e con Andrea i se aea jà endrezà per jir a fèr nascer sia pruma creatura a Maran. Chiò per rejon de post i ge à fissa l’apuntament per la vijita ai 4. 

Endèna l’é stat avert ence Ciavaleis, ma a Federica e Andrea ge restèa vèlch dubie: fosc mudèr a l’ùltim moment per jir te n nef partiment giusta avert podea esser n risech.

Ampò ai 4 de dezember, su envit de na ostetrica de Ciavaleis che cognoscea Federica, i à dezidù de se fermèr te l’ospedèl forin Fiem per veder coche l’era chest nef partiment, e l ge à fat na bona imprescion. A chest se à jontà l pensier che i aessa cognù fèr n viac belebon lonch per jir fin a Maran. I à dezidù coscita de avisèr Maran che i fossa jic a Ciavaleis. La pissèda se à confermà deldut trefèda canche, amò ai 4 da sera da les 11, Federica à tacà a aer la dolìes. I é peé via da Pardac e la sitèdes é states sobito fortes e de spes, tant che Andrea l’à ence cognù se fermèr n pèr de outes tel trat de strèda anter Pardac e Ciavaleis: bon che no i à cognù jir enscin a Maran!

L’indoman bonora Nives é nasciuda e dut é jit ben. L clim chiet e seren arsegurà dal nef partiment de nasciuda de Ciavaleis é stat metù mingol sotessora demò da la procescion de politics, giornalisc’ e coriousc che en mercol à volù jir a troèr i neves nasciui, no demò Nives, ma ence Riccardo, ruà adalèrch sobito domesdì. I tor dant l’é stat, soraldut per la mères, mìngol de fadìa de più... ma paa ben la speisa!  (Lucia Gross)