Cultura y bona ueia!

Data

19 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Domesdì Leterer Ladin´ Poetry Slam y mujiga ladina

L ie urmei deventà na tradizion de mëter a jì, da pert dla Union di Ladins de Gherdëina, n Domesdì Leterer Ladin via per l instà tl verzon dan la Cësa di Ladins a Urtijëi. Y bele mpont saràla nce chëst ann tan inant n sada ai 25 d’agost.

Ti ani passei, plu avisa dal 2012 inant, à autëures y scritëures nia mé de Gherdëina ma nce dl’autra valedes ladines lascià audì a n publich for scialdi nteressà si pec de poejies y proses per ladin. Nce mujiga y cianties ladines à daniëura abelì uni domesdì leterer alalergia.

L ann passà ons scumencià a fé n poetry slam cun leprò pec rap per ladin; chëst ann iel sun l program n POETRY SLAM che à nce na tematica: “Ti dé tëmp al tëmp”, a una cun la tematica dl 2018 dl proiet di Cunsëies de Furmazion de Gherdëina. 

Cie ie pa poetry slam?

Ma cie ie pa perdrët n poetry slam? Na cumpetizion pra chëla che autëures liej dant o dij su al publich - che ie depierpul nce la iuria y vën perchël trata pea tl spetacul - si pec, de si prosa y poejia, te na forma d’esprescion particulera, cun juesc de paroles, cun na cërta ntunazion, n cër’ ritm ti sonns y tla usc, nsciuma te na cërta performance.

Dala cinch domesdì inant cun i set autëures

L Domesdì Leterer Ladin scumëncia dala 5 domesdì tla Biblioteca Ladina “Anda Malia da Cudan” tla Cësa di Ladins y tlo se prejenteràl al publich i autëures: Nadia Rungger, Irene Moroder y Ivan Senoner de Gherdëina, Simon Kostner y Christian Ferdigg dla Val Badia y Silvia Murer y Vigilio Iori de Fascia. I poec-slammer nes lascerà audì si cumposizions te chësta maniera mo scialdi nueva y revoluzionera, y dut chësc tla rujeneda ladina.

Sofia Stuflesser mëina tres la manifestazion

La jënt che vën a scuté su, aviseda dala jëuna Sofia Stuflesser de Urtijëi che sëurantol la prejentazion y muderazion, puderà aldò di aplausc y de si atlamazion, dì la sia n con’ dla raprejentazions. L Domesdì Leterer Ladin dà bele danora da ntënder che l se traterà de velch de particuler y nteressant per duc, jëuni y manco jëuni.

Cunzert dla ciantarina cunesciuda Martina Iori y si Trio de Fascia

La manifestazion jirà pona inant alalergia, tl verzon dan la Cësa di Ladins, te n’aria de festa cun n cunzert dla ciantarina cunesciuda Martina Iori y si Trio de Fascia. Ntant vëniel pità da maië y da bever y l ne mancerà nia la fanedes cujinedes sambën iló al mumënt!

La Union di Ladins de Gherdëina nvieia duc y dutes a unì y a fé pea al

DOMESDÌ LETERER LADIN!


Foto:

 L placat dla manifestazion.


Galaria retrac