La gran emuzions dla premiere dla Dolomitale

Data

08 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N juebia sëira ai 8 de nuvëmber iel stat la giaurida dla Dolomitale, l gran Filmfestival a Urtijëi che va inant nchin ai 11 de nuvëmber.

L festival ie unì naugurà cun l film “Die fünfte Himmelsrichtung” dl reghisser de Gherdëina Martin Prinoth. Si film documenter conta de n pitl mut tëut su de Urtijëi che ti va do a si ravises brasilianes. Tl film vëniel rujenà tudësch, portughes y sambën ladin, dut cun sottituli per nglëisc.

Mo n iede n dumënia

Lukas Pitscheider, diretëur y ideatëur dla manifestazion, à n juebia sëira pudù saludé na sala tocia y plëina de jënt tla sënta dla Lia Mostra d’Ert sun Plaza de Sant Antone a Urtijëi. A dì bel la urità fòvel nce mpue’ de delujion y nce vel’ un belau mpue’ dessenà, ajache l ne ova nia pudù ite a ti cialé al film. Propi perchël à i respunsabli fat ora de mustré l film mo n iede n dumënia ai 11 de nuvëmber dala diesc danmesdì. Chiche à nteres fej bën a se spazé y a apusté danora la cherta, per vester segur de ruvé ite.

Cunliamënt cun Prinoth a Hamburg

Paroles da lauda y de rengraziamënt iel stat pra la premiere da pert dl ambolt de Urtijëi Tobia Moroder. Ingrid Runggaldier à, do l film, muderà n cunliamënt tres Sype cun l reghisser dl film. La tematiches tratedes da Runggaldier y pona da pert di prejënc, de gra al cuntat ndrët cun Prinoth, ie sambën states chëles dla identità y dla ravises, cun vel’ referimënt nce critich per la storia che ie de Urtijëi, ma che ie dal’autra pert na “pars pro toto” de truepa situazions de aduzion coche tl cajo dl film. Sciche de dì, la storia ëssa pudù suzeder y ie suzeduda te truepa lueges dl mond. Mpo ie film y storia tacheda ite te na maniera strënta - nce o dantaldut tres la rujeneda gherdëina da audì tl film - ala realtà de Gherdëina y dla Ladinia.

Per infos plu avisa n con’ dl program dl bel festival de films a Urtijëi, iel mesun jì ite tla plata internet www.dolomitale.com. Nuzëve dl’ucajion de udëi de biei films!

Nce cun popcorn y na cola y vel’ autra gulusaria ntan l film. Mpue’ sciche zacan, canche l fova mo n chino a Urtijëi!

Sun la fotos: mprescions dla premiere.

David Lardschneider