Ti savarál mo ciamó bel?

Data

12 de messel 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Na cossa ch’i á osservé plü iadi.
Zacan n de ti metôi averda a na familia de ghesć cun n pice möt, mo da dí la verité l’âi bele odü plü gonot. Ai s’la spazierâ ite por bosch y le möt saltâ por incërch: ”No salté, che te tomes y te spaches n brac”, dijô la uma. Le möt vá plü plan y ti vá pormez a n formiá. ”Ocio che les cargares pizia, vá demez dailó!”, dijô sëgn le pere. Bëgn bëgn, demez ince dal formiá. Ite por le tru strënt metô le möt indô man da salté. ”Sce mo vá plan, che te chëstes raisc poste ciumpedé”, dijô indô n genitur, ”y no t’arpizé sö por chë pera, che cun i spic podesste te taié.” Inscioma, gnanca chël. Ala fin él le möt che se cüfa jö y brancia ite la sternüda sön terac. Indô salta ite la uma: ”No pa mëte i dëic tla bocia, che t’as les mans pazes y te podess te trá ados valch.” Mo Coca Cola jô bëgn bun da bëre. Inscioma, chësc püre mandl gnô amoní y manacé ia y ca - i me pënsi bëgn cun les mius intenziuns - mo ince i geniturs me mënâ zacó picé cun döt chël stres da scraié ’no fá chësc y no fá chël’. Y spo me damanâi: ti savarál mo ciamó bel, a chël buricio, da gní n de te munt, sce al n’é - sciöche i geniturs ti recorda tres indô - nia ater co prighi? Deperpo me pënsi che sce an i lasciass pa pö ma fá, chisc pici, ai imparass n gröm de cosses y al ti savess davëi bel, tl bel gran parch dai jüc dla natöra.  (Pablo Palfrader)