Cianté ladin en compagnia… te ostaria

Data

21 de setember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dodoman, sabeda ai 23 de setëmber, dales 19:30 inant, tl Hotel Alpenrose a La Val
Dan da cater agn él gnü dé fora dala Uniun Ladins Val Badia n liber de cianties ladines dal titul "Cianté ladin en compagnia". Al se trata dl secunt liber de na triada, te chëra che la pröma publicaziun (Cianté ladin, 2011) cöi adöm cianties profanes por cors a trëi o a cater usc y la secunda é n adatamënt a döes usc, ince fora dal repertore profan. Le terz liber indere é dötaorela tla fasa de elaboraziun (cianties de dlijia por cors a cater usc). I auturs dla trilogia é (do l’alfabet): Iarone Chizzali, Andrè Comploi, Tone Gasser y Bruno Rives. Chëstes porsones á lauré cun gran competënza y pasciun y ti á dé ala popolaziun ladina libri preziusc por tigní via y slarié fora la gran tradiziun dla ciantia ladina. 
La Uniun di Ladins Val Badia á insciö ponsé a n format por valorisé sides les publicaziuns, sides le cianté dla jënt. Al é gnü l’idea da tó ala lëtra le titul dla secunda publicaziun “Cianté ladin en compagnia” y da la porté fora por les ostaries, invian düc a cianté para, sciöche al gnô fat plüdadî pro vigni bona ocajiun da sté adöm. La pröma incuntada é stada tla ostaria Sotrú a La Plí, olá che al é ince gnü fat la presentaziun ofiziala dla publicaziun. I auturs instësc á cunté dl laur doia y á condüt fora por la sëra intonan tröpes dles melodies racoiüdes tl liber. La secunda ediziun é spo stada a San Martin, tla ostaria Tasser. 
Un di traverc dla manifestaziun é ince chël de cianté toc nia tan presënc tla tradiziun: insciö vëgnel chirí fora öna o döes cianties manco conesciüdes y an se tol la bria de les porvé jö plü avisa, cina che ares sona bun. Dedô passon la sëra deboriada, ciantan dötes chës cianties che la jënt se damana.
En chësc ann sará la manifestaziun a La Val, tl hotel Alpenrose (dodoman sabeda ai 23 de setëmber, dales 19:30 inant). A daidé intoné les cianties sarál Konrad Tavella, dirighënt dl cor dles ëres da La Val.