Paurs cuntra le lu

Data

11 de otober 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I paurs de Südtirol ciara zoruch a n isté movimenté por gauja de plü armënc scarzá dal lu. La politica provinziala se damana man plü lëdia tla gestiun. N stüde EURAC dij che sconé i pastorëc foss miú co copé le lu.
Ester mëssel sté ca por de vigni sort, le lu. Chësc tier che á zënzater ince süa fascinaziun, é dagnora n pü’ gnü tut sciöche le rî. Tles stories ti soflel demez la ciasa ai trëi pici porcí o se mangia la lâ de ciüria cöcena, mo ince tl baié vëgnel sovënz dant. Canche an á chël feter me iadedô, dijon ”le lu al cü”. Canche la falc é da scich o ne taia nia indortöra, dijon che ara á le lu. Inscioma, scialdi na conotaziun negativa. Y chësta conotaziun á le lu ciafé suradöt iniann, do i caji de tiers scarzá: cotanc te Südtirol - un tla Val Badia - mo ciamó deplü tles provinzies vijines de Trënt y Belum. Tema dër debatü ti social media, a livel dër emozional y alüsc cun posiziuns ince dër rigoroses: de un n vers paurs che ó defëne sü tiers y ó avëi demez le lu a vigni cost, dl ater vers ambientalisć che oress na super sconanza por le tier, zënza discusciuns. Le tru podess ester amesa ite.
Ci fá? La Provinzia de Balsan finanziëia cun contribuc dal 70% insö mosöres de proteziun - sis eletriches y cians da verda, por nen nominé döes - madër che da na interogaziun di Vërc lion che gnanca n paur su ne n’á fat domanda. Nos sun jüs a damané Walter Valentin - rapresentant ladin tla Lia di Paurs de Südtirol - por damané ci che al nen pënsa de döta la chestiun. Ël spera che la politica se dais da fá por arjunje na soluziun, che é do süa minunga chëra da smendrí le livel de sconanza dl lu y avëi la poscibilité te cer’ caji da ti trá. Por i provedimënc de sconanza (por todësch Herdenschutz) ál pücia simpatia: ”I ne ti un degüna crëta ai provedimënc de sconanza. Chësta é na cossa dër nöia. Ai vëgn a t’la cunté sö sciöche ara funzionëia, mo nos sun dër scetics. Nos paurs sun dër tradizionai. I un da 150 agn chësc sistem da jí a munt y al vá dër bun.” Zënza depënjel n cheder de previjiuns bindebó scöres por i paurs ala munt, sce an ne tol nia provedimënc: danter chisc anunziëiel danns por le turism, munts lasciades sö, cina a paurs che se tëgn i tiers te stala, canche al dij: ”I á damané deplü paurs ci che ai fej, sce al é i lus te munt. La maiú pert m’á respognü che ai se tignará i tiers a ciasa.” Por Valentin la maiú protesta che podess ester. An alda fora pücia orenté da orëi mudé val’ respet a chël che an á dagnora fat.
Dal’atra pert é le lu chiló y sce an ti crëii ai esperc, spo podarán se tó fora dl ce da avëi tl dagní na provinzia lëdia da lus. Eurac Research á dé fora ala fin de setëmber n stüde che se dá jö cun ”Le lu tl Südtirol”, portan dant la situaziun. Danter l’ater vëgnel ince zité na inrescida publicada dala revista spezialisada ”Frontiers in Ecology and the Environment”. Chësta dij insciö: olache an á tut la dezijiun da stlopeté i lus, é le numer de tiers scarzá ma jü zoruch tl 29% di caji, deperpo che tl 43% di caji él jü söpert. Olache an á adoté mosöres de sconanza, án indere albü n smendrimënt tl 80% di caji. Y sce an ó ince chiló tó ca proverbs o manires de dí, spo nen ciafon un ince por ladin, che dij: ”Canche an á le lu en ciacia, vëgnel”.
Proverbs a pert, lion tl stüde ince trëi scenars de reaziun ala situaziun. Le piec resultat arjunjon sce an ne fej nët nia. Le miú resultat - dij le stüde - arjunjon cun les mosöres de proteziun. 

T’La Usc di Ladins di 13 d’otober podarëise lí deplü sön le stüde Eurac y sön ci che la politica provinziala se tol dant. Sambëgn ciafarëise ince döta la intervista a Walter Valentin.




 (pablo)