Dá ia i laurs

Data

13 de otober 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I laurs por la realisaziun dl azes nü por la Val Badia é gnüs assegná ala al’assoziaziun temporana de impreses formada dales dites E.MA.PRI.CE., Karl Wieder, Nordbau Peskoller, Niederwieser Bau y Transbagger.
Desche la Provinzia scri ti él gnü surandé l’apalt dl’Ajentöra por i apalc dla Provinzia de Balsan por ci che reverda la realisaziun dl azes nü tla Val Badia tl Comun de San Laurënz al’assoziaziun temporana de impreses formada dales dites E.MA.PRI.CE., Karl Wieder, Nordbau Peskoller, Niederwieser Bau y Transbagger. Sön la basa d’asta de 47,6 miliuns de euro él le grup che á fat n’oferta de 40.560.287,66 de euro (zënza IVA)che é insciö chëra plü vantajosa en confrunt ales atres cater ofertes. Le tëmp de realisaziun dl’opera sará de 900 dis. “Cun la surandada di laurs por ci che reverda l’entrada dal Val Badia él gnü fat n vare important por ci che reverda la realisaziun dl’opera stradala che fej pert de na linia de operes partides sö sön döta la Provinzia”, dij l’assessur por la mobilité Florian Mussner.

Por la realisaziun dl azes ala Val Badia cun na galaria êl preodü, aladô dl proiet elaboré d’inteja cun le Comun y i esperc dla sconanza por l’ambiënt, paesaje y bëgns culturai, n investimënt de 75,5 miliuns de euro (cumpedan lapró les esproriaziuns di terac, la cuota IVA y cosć ajuntifs). L'entrada nöia por la Val Badia piará ia dala ota dla strada statala dla Val de Puster dlungia Ciastel Badia cun n punt sura le lech artifizial „Kniepass“ y che röia spo te n tunel cina Flaurënz, fraziun de San Laurënz. L’entrada por la Val Badia gnará realisada zirca 400 metri dan le tunel de Ciastel Badia cun strades separades por l’entrada y la sortida cun n’atenziun particolara ince por le paesaje.

La strada d’azes ala Val Badia sará arbassada cun n punt de 140 metri sura le lëch artifizial por passé spo sura la linea feroviara surafora cun n tunel sot le col fora por incrujé spo indô la strada dla Val Badia tla localité de Flaurënz. La galaria sará 950 metri lungia y döta la trassa é te na zona zënza de gran disliví. Por smendrí ciamó deplü l’intervënt söl paesaje gnará na pert dla strada curida che incrujëia la strada statala dla Val de Puster. La infrastrotöra nöia sará n alisiramënt por i abitanc de San Laurënz y Flaurënz.