Video de lus a San Ciascian? ”Nou!”, dij le verdaciacia

Data

14 de merz 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Da zacotan de dis incá rodel n video che dess mostré n tlap de lus sura Glira a San Ciascian. I ti un damané al verdaciacia de Badia ci che al nen pënsa.
Le borjú dal lu ne dá nia do. Insciö rodel da zacotan de dis n video sön Facebook y Whattsapp, che dess mostré n tlap de lus a San Ciascian. Ince iö sun un de chi che l’á ciafé. Pro le video êl scrit ”San Ciascian - Wildkamera sora Glira”. Le video é gnü odü y partí n gröm de iadi sön Facebook, cun desënes de comentars lapró. Tröc ne s’á nia bëgndî damané da olache al vëgn, che che l’á fat y suradöt sce al é bëgn vëi che al é San Ciascian. Nos ti l’un damané a Herbert Comploi, che é dal 2002 incá verdaciacia dl revier de Badia, che tol ite ince San Ciascian. Ël conësc le raiun sciöche sües gofes. Nosta pröma domanda é naturala: é pa le video veramënter fat a San Ciascian? Süa resposta: ”Pu no no, gnanca sce t’os!”. Y al injunta na reflesciun dër scëmpla: ”Bel iló dlungia él vigni de incër 25-30 cerf che stá cina danmisdé ia. Mineste che ai stess iló, sce al foss cin’ lus che roda?”
Aladô de informaziuns coiüdes da RAI Ladinia, dess le video ester tut sö tl Venet. Oramai él indere por incërch y sce le fin ê chël da somené tëma tla jënt, spo ál arjunt so fin. Insciö nen sarál indô zacotanc o zacotantes che ne s’infida nia plü te bosch, ne vá nia plü a fá paslunch canche al albiëia, ne vá nia cun les pels da doman adora y se sara daite, no ma te ciasa, mo suradöt tla porjun dla tëma, che pó ester la piec de dötes.  (pablo)