Leri tla ciasa Peslalz: mo ai vëgn abiná!

Data

22 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Trëi leri á metü sotissura la ciasa Peslalz a Badia, al momënt nia abitada, por se tocé ia patüc da zacan. Le coraje de dui jogn dl post i á condüc tles mans di carabiniers.
Tl tëmp fora de sajun él chît tla Val Badia. N chît che trëi todësc danter 27 y 46 agn - dui ëi y na ëra - á en Pasca de Ma orü anuzé por romené fora na ciasa vedla. Cernü ái la ciasa Peslalz de Badia - dejabitada. Dui jogn dl post che passâ iló a pe s’un á intenü che al ê dan la Raiffeisen n auto cun targa todëscia y delá da strada les trëi porsones che porvâ da daurí la porta. Canche i malintenzioná i á odüs, s’un ési jüs zoruch t’auto. Mo ma por le momënt. Pornanche i jogn s’un é stá, á i trëi todësc spaché ite na porta tla pröma alzada por rové tla frabica, meton man da se tó fora patüc vedl de vigni sort: ciandeliers, platôs da pelter, patüc de lëgn. I jogn ê intratan jüs a se bëre val’ y canche ai gnô zoruch, ê l’auto tres ciamó iló, ci che á descedé sospet. Ai á aspeté y bel avisa êl i leri che gnô da ciasa fora. En chësc iade ti á i jogn damané ci che ai fajô. I trëi plindernâ döt t’auto y orô s’un jí, mo i jogn s’á metü dan auto. Un ti trëi é spo gnü fora dijon che ai orô cumpré le patüc, mo intratan â i jogn bele alarmé i carabiniers. Söl post él rové chi da La Ila, Corvara y Al Plan. Les forzes dl ordin á aresté les trëi porsones, che é insciö rovades val’ dis te porjun. T’auto di trëi án ciamó ciafé dui cortí cun lames danter 17 y 20 zentimetri, sciöche ince n despositif por eletroshock. Bele le mertesc ai 22 de ma é i trëi rová dan signoria y é gnüs condaná por via direta a 1 ann y 6 mëisc de porjun y 400,00€ de straufunga, cun condizionala. Chësc ó dí che intant é i trëi lëdi, mo sce ai cometará n ater reat ti proscims 5 agn, tocarára da despaié ince chësta condana, dlungia la secunda eventuala. Chësta matada - tl plü bel danmisdé - ne i á nia paié la mëia. A vigni moda: i carabiniers alza fora l’importanza dla colaboraziun dla jënt. N edl acort pó - sciöche te chësc cajo - dé n contribut fondamental.  (pablo)