Le cor "Cantus Iuvenis" variëia sön trus plajors por ciantadus y ascutadus

Data

21 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Val’ impresciuns dal conzert dl cor da Víena te söa ultima turné "Trus - Wege" cun tapa a Bornech
Al é na bela tradiziun che le cor moscedé da Víena sot la direziun de André Comploi "Cantus Iuvenis" vëgn y roda intres indô te Südtirol por tigní deplü conzerc. En chësta aisciöda é le cor de jones y jogn stort pro a Bornech (Ciasa Ragen) y a Badia. Lapró tignel insnöt ai 21 de jügn ciamó n conzert a Víena.

Tla presentaziun y descriziun dl program "Trus - Wege" él da lí che la porsona röia sön trus che coliëia, trus da sciampé, trus che porta fora, trus che condüj a ciasa... I sun tresfora sön tru da jí "trus". Le tema di trus se mostra interessant y desfidënt por n dirighënt de cor, al é n tema ampl y spës, che dá ince la poscibilité da descurí cultures y cianties nöies. Insciö á André Compli, che é chersciü sö a Al Plan de Mareo y abitëia aldedaincö bele da agn a Víena, insigné ite n repertore plëgn de contignü y varieté, y ince genres desvalis (sciöche la spana dal cianté coral tradizional al modern): n iade büsi bi ligri sön Munt de Suc, „Seiseralm“, cun la ciantia dal medemo inom, spo se möii bi capazi cuntra i sonns dla melodia conesciüda dla Disney „Circle of Life“, ai spazirëia dedô bel plan y surapinsier da „And so it goes“ de Billy Joel y s’un vá plëgns de speranza da „the Lonesome Road“ de James Taylor y Don Grolnick.

Dl cor fej pert n bel numer de jones y jogn (ince studënc atuai a Víena) dala Val Badia, porchël á te chësta turné ince deplü cianties ladines söa lerch: "Lisierëza" (ciantia cun melodia de Bruno Rives y test de Carlo Suani) y "Ones de bëgnsté" (melodia de Franz Comploi sön n test de Iaco Ploner). Lapró él da aldí por le pröm iade la ciantia „Le lisció“, scrita aposta por le cor da Iarone Chizzali (musiga) y Iaco Rigo (parores).

Les impresciuns

Al é na morvëia da ascuté sö y ciaré pro chësc conzert, studié ite cun gran preparaziun y partezipaziun. Le dirighënt motivëia y mëna le cor cun gran energia, jones y jogn stá y se möi te na disciplina lesiera y plajora. Por porté ite adöm ales usc n pü’ de vitalité comparëscel movimënc y coreografies, che comporta na parüda spontana y ligherzina. Le conzert se svilupëia inant zënza tomé tla monotonia y tira tres indô l’atenziun y le plajëi sön n toch che vëgn trasmetü cun gran segurté y armonia. Ci che le dirighënt n’ó nia, é che la presentaziun devëntes plata y artifiziala, porchël mëtel ince tl program val’ toch internazional che pó plajëi a sü ciantarins jogn. A vigni manira án l’impresciun a fin conzert che le monn porté dant dales usc dl cor y dales performanzes teatrales (laurades fora y coordinades da Barbara Rottensteiner Comploi) sides te so dër post y dais ligrëza da vire y motivaziun da descurí le monn (ince culturalmënter). I trus é tröc, mo ai liëia tres val’ y zacai: porchël ái n sëns y n travert. La varieté stilistica cernüda da André Comploi por chësta turné pe na aventöra sfadiosa, mo é te söa realisaziun na "escursciun morjela".  (Iaco Rigo)