STOP ai motors iten Antersasc

Data

08 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Jí cun le motor tla Val de Antersasc n’é nia conzedü, recorda i carabiniers y la forestala. N grup de porsones cun le motor s’á ciafé straufunghes.

N grup de porsones á ciafé straufunghes ai 4 d’otober tla Val de Antersasc tles vijinanzes de Crëp dales Dodesc tratan che ai fajô motocross. Insciö él la forestala y i carabiniers che é intergnüs porvia che al n’ê nia gnü respeté la proibiziun dla zircolaziun te zones sot a sconanza y por le drumblamënt fat. Le diretur dl Ispetorat dla forestala da Bornech, Silvester Regele, comunichëia l’intervënt dla forestala adöm cun i carabiniers dla val Badia. “Ince sce al é proibí vëgnel gonot a se le dé che porsones fej motocross ti bosć y sö por munt. Cun le motor ne vëgnel nia ma gaujé incuinamënt acustich y dl’aria, mo jí cun le motor sö por munt é ince n desturb por i tiers y por les porsones che vá a pe”, spliga Regele. La proibiziun da passé cun veicui a motor nia autorisá é preodüda dala desposiziun sön la zircolaziun te teritori sot a sconanza idrogeologica y dl paesaje (lege provinziala 10/1990).

Por la contravenziun vëgnel apliché na straufunga aministrativa de 200,00 euro canche les violaziuns vëgn fates te raiuns corografics, parcs y resserves naturales, biotops y monumënc naturai sconá. Ti parcs naturai vëgn l’import aumenté dl 50 porcënt. Le passaje vëgn ma conzedü sce le patrun dl terac dá süa aprovaziun scrita y sce ince la forestala dá l’aprovaziun. Sce i piloc proa da s’un sciampé dai controi, sce ai se comporta te na manira prigorosa che podess mëte tl prigo les porsones o sce i motors ne n’á degöna targa o na targa nia aprovada él preodü le secuester dl veicul.  (Iaco Rigo)