I jogn ciafa na ciasa sön Börz

Data

12 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Vare storich por le laur por la jonëza tla Val Badia y te Gherdëna. Le Sorvisc ai Jogn y la Cöra da Balsan á arjunt n’acordanza por la gestiun dla Ütia de Pütia sön Börz. L’ater ann gnarára ressanada y podará gní anuzada dales lies che laora cun mituns y jogn.
La Ütia de Pütia é na strotöra sön le ju de Börz, che é da 49 agn incá tla proprieté dla Cöra da Balsan, che l’â metüda a desposiziuns por grups desco minis o schires joniles, por passé valgügn dis te munt. Incö n’é la ütia indere nia plü tles mius condiziuns y ara adora n ressanamënt. Val’ podess sëgn defata se mudé, deache ai 8 d’otober él gnü fat n vare storich: ian Funes él gnü tigní na sentada danter rapresentanc dla Cöra da Balsan y le Sorvisc ai Jogn Val Badia. Deache la ütia é sön terac dl Comun da San Martin, s’á la Cöra da Balsan damané la colaboraziun dl Sorvisc ai Jogn, che á sot so tët bëgn 44 lies che se dá jö cun mituns y jogn. Travert dla colaboraziun é chël che la strotöra vëgnes indô anuzada deplü, y chësc comportará vantaji por intrames les perts: por le Sorvisc ai Jogn che les lies dla Val Badia y de Gherdëna podará la prenoté danfora a de mius condiziuns, por la Cöra da Balsan - che restará inant proprietara - che la ütia vëgn adorada deplü y an cür insciö plü saurí i cosć de gestiun. Tres la colaboraziun án ince imënt le ressanamënt dla ütia, che dess mëte man l’ater ann da d’aisciöda y jí a piz por la fin d’agost. Te Südtirol él passa 20 de chëstes ciases a desposiziun de grups. Chëra de Pütia é la pröma ütia sön terac ladin.

T’La Usc di Ladins di 19 d’otober sarál Valentin Erlacher - coordinadú dl Sorvisc ai Jogn, che dará informaziuns menüdes sön la colaboraziun danter Cöra da Balsan y Sorvisc ai Jogn, mo ince details sön co che la ütia gnará gestida.  (pablo)