Costa da La Val: majun en flames. Foto y video

Data

08 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tla nöt dai 7 ai 8 de novëmber él rot fora n gran medefüch tla vila de Costa da La Val. Na majun é vardüda jö daldöt.
I Stödafüch n’á veramënter degüna tria chisc dis. Do le gröm de intervënc por le rî tëmp, él sëgn rot fora n gran medefüch tla vila de Costa da La Val. Al ê tla nöt dai 7 ai 8 de novëmber incër la öna che les sirenes ringhinî te deplü paisc dla Val Badia, deache la majun de Otto Ellecosta de Costa ê en flames. Söl post él rové düc i corps de stödafüch dla bassa valada, lapró chi da Badia y plü inant a stödafüch da Bornech ciamó condüt bomboles por i grups di respiradus. Döt adöm él rové söl post incër 160 omi. ”Le patrun s’un á intenü canche la majun vardô bele dassënn - nes dij Ludwig Sottara di Stödafüch da La Val - I n’un albü degüna chance da la salvé y canche i sun rová sö, ânse gran ora da salvé la ciasa dlungia, che manaciâ da pié füch por le gran cialt.” Por desfiré l’intervënt á i stödafüch messü s’arjigné na condüta de za. 1.500 metri por pumpé ega dala Gran Ega a Preroman cina sö tla vila. N deslivel de chi 400 metri, por chi che al á orü ester set pumpes. Lapró án adoré l’ega dla vasca y di idranc che ê tla vila y nia inultima nen condujôn do cun i tancs di stödafüch. Por la majun n’él plü sté nia da nen fá. Ara é vardüda jö daldöt, cun laite ince n transporter y valgünes de mëndres mascins. Altamo á le patrun Otto, so fre Toni y l’ojoradú sciafié da salvé düc i tiers. La Crusc Blancia de Mareo é ince rovada söl post, mo por fortüna n’él sté degügn feris. I Carabiniers é rová alerch por fá les inrescides de dovëi y porvé da ciafé fora les gaujes. Al n’é nia le pröm iade che al verd sön Costa da La Val. Bele ala fin di agn 60 â n medefüch desdrüt feter döta la vila.
Al patrun i vál ince da nosta pert la solidarieté por chësc fat da desplajëi che l’á atoché.

Chiló podëise ciaré n video che mostra tan gran che le medefüch ê.
https://youtu.be/p1vPj6aZmqg


 (pablo)