Deplü co n liber da cianties

Data

15 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
”Jun a cianté!” é le titul de na publicaziun nöia realisada da André Comploi d’Al Plan/Viena, che contëgn 25 cianties tradizionales por mituns, te cater lingac. N contribut al cianté deboriada y al plurilinguism di mëndri. La novité: les cianties pón ince ascuté online o s’les tó para te na app.
Chësta sabeda ai 17 de novëmber dales 4 domisdé gnarál presenté tl salf dl Istitut Ladin a San Martin de Tor na publicaziun nöia, che porta le titul ”Jun a cianté!”. Ara se trata de na racoiüda de 25 cianties tradizionales por mituns cun la particolarité che ares é dan man te cater lingac: ladin, talian, todësch y inglesc. La opera é gnüda dada fora tres l’Istitut Ladin ”Micurá de Rü” y an podess la definí le früt de n sforz musical y ince leterar fat dal espert cultural y musical André Comploi d’Al Plan, che vir y laora incö a Viena, sciöche capostampa dla Wiener Staatsoper. Comploi - bele autur de de plü publicaziuns musicales tl ladin - á te chësta opera cernü döt cianties tradizionales tramanades da dezens incá. La maiú pert vëgn dal cërtl cultural todësch, d’atres da chël inglesc, talian o franzesc. Öna sora é la ciantia originala ladina: ”Pesc dla sëra”, scrita y musigada da Compoi instës. Döt cant vëgn abelí dai dessëgns da corú de Matteo Rubatscher da La Val, che fej da pert integranta; ilustraziuns che respidlëia i contegnüs dles cianties y ti dá a döta la publicaziun na parüda da orëi bun y dala buna löna.
Dlungia le liber instës, á l’Istitut Ladin fat n vare inant: dötes les cianties é ince gnüdes tutes sö te stüde y vëgn ciantades dant da mitans y mituns dla Val Badia, cun l’acompagnamënt de strumentalisć. Les cianties é gnüdes tutes sö cun musizisć dal ví, zënza sonns sintetics o computerisá. Por les ascuté, ciafon tl liber sot vigni ciantia ite n codesc QR, che an pó scanerisé cun le fonin o tablet, a na moda da gní atira coliá online por s’aldí la ciantia ciantada dant - te düc cater i lingac. Le proiet vëgn completé da na app por smartphones y tablet.

Deplü ciafëise t’La Usc di Ladins di 16 de novëmber, olache i ciafarëis na intervista cun l’autur André Comploi, sciöche ince n codesc QR por porvé da ascuté na ciantia sön osc fonin.  (pablo)