La Usc di Ladins

Tl prozes de daurida dles ativités do la gran arferada y stlüta por le coronavirus vál debojëgn dantadöt de »respet«. Respet án por i atri, canche an á da fá cun i atri, tl pinsier, tl sentimënt y tl comporta­mënt.
Daurí sö »cun le virus« – deache i ne podun nia aspeté a canche al sides desgort y eliminé daldöt – ó dí tigní ite les desposiziuns dades y scrites dant, p.ej. da se trá sö le mascherot canche an incunta zacai alaleria y canche an vá te locai y bo­të­ghes. Ma cun sconé i atri y se sconé dai atri jarunse tres chëstes fases do le stop. Döt chësc stá ite tl moto che les provinzies de Balsan y Trënt á: »Co jarunse pa inant?«, y nia »Can jarunse pa inant?« Sëgn adorunse politics che á coraje y intelet diplomatich, ara nen vá de cuché fora dal cuze y ciaré tan infora che i podun jí. Y jí mëss spo gran pert dla jënt, nia ma la politica, ajache les ativités y la vita da vigni de é fata dala jënt. Roma regolará inant rigorosamënter les scores, y ince i gragn spostamënc. Incër i confins, chi nazionai, ne podará les provinzies y regiunes ne dí nia cis tröp – mo ince chiló á Südtirol arjunt zacan n de adöm cun le Land Tirol y le govern a Víena almanco n passaje: i studënc dl'Université, la »Landes­universität« tla storia, podará passé fisicamënter le Prener. Val' se möiel, ince sce ma cun de pici vari te döt le contest general.
I funzionars dl turism sará sëgn creatifs, y svilupará val' idea cinamai atrativa. Ostaries y üties da munt anuzará la lerch defora y incëría. Sambëgn se röia la liberté de vignun olache chëra di atri mët man, porchël vel ince chiló le slogan »respet«. Tl respet dla coletivité y dla natöra podess indó se möie le turism, chël da d'isté che é natöra y aria alaleria. Al podess gní na aventöra por un o l'ater da jí a sté te na ütia da munt o sojorné ti agriturisms... Odarun ci fantasia che i gesturs á deventan creatifs, al é poscibilités interessantes, tres tl respet di atri. Y tles plazes di paisc podessel indó storje pro vita y compagnia. Al gnará ince en chësc ann isté y vacanza. Esperc dl turism nazional dij che la munt tira sëgn dant al mer, deache les restriziuns antivirus é plü ries da realisé sön na spona dal mer. Ai dij ince che la jënt jará en chësc ann püch fora dla Talia y se spostará porchël chiló. Vigni mal é bun por val', a chësta manira impararunse da conësce miú posć dlungia impede p.ej. les Seychelles, Formentera, Creta o Miami tla Florida. L'isté podess en chësc ann ince s'arlungé de val' mëis, odarun co che la situaziun y condiziun se svilupará. Magari aprijunse sëgn deplü n bun café dan na ostaria, la bona aria de munt y la poscibilité da fá n iade p.ej. tla Toscana. Forsc unse ince spo imparé da avëi plü respet dan ala liberté, personala y politica che i ún. Tröp depenará da nos instësc y »co che i jun inant«. Ajache da co che i jun inant, vignun, depanarál ince sce i podun jí inant deplü!  (de Iaco Rigo)