La Usc di Ladins

En jöbia ai 7 de ma él gnü stlüt jö na acordanza danter le Govern talian y la CEI - Conferenza Episcopale Italiana, che pormët indó da jí a mëssa, dai 18 de ma inant. Do la pröma ligrëza vëgnel sëgn ince la duscia frëida: les mosöres de precauziun é cotantes y a valgügn ploans y ince fedei podessel i passé la vëia. La Diozeja de Balsan/Porsenú á mené fora n comunicat, olache al vëgn splighé ci che al é da tigní ite.

Le ploan mëss dí tanc che pó jí a mëssa
I fedei dess jí ite un a un te dlijia y tigní les destanzes de almanco n meter un dal ater. Le rapresentant legal dla Ploania (scialdi le ploan) mëss definí tan de jënt che pó gní te dlijia, aladó dla grandëza. Pro vigni porta mëssel ester na porsona che controlëia l azes di fedei. Chëstes porsones mëss avëi mascherot, manëces y n simbol che i cuntrassegnëia sciöche responsabli dl ordin. Chisc mëss ince ciaré che al ne röies nia te dlijia plü fedei co preodü.

Mascherot y poscibilités da se dejinfeté
Düc chi che vá a dlijia mëss avëi n mascherot. Porsones che á plü co 37,5 gra de borjú ne pó nia ite y insciö gnanca chi che á sintoms da coies o che é stá en contat cun porsones atocades da coronavirus. Dan vigni entrada mëssel ester la poscibilité da se dejinfeté les mans.

Dejinfeté dlijia y sacrestia do vigni funziun
Do vigni funziun mëssel gní dejinfeté la dlijia y la sacrestia y lascé ite aria assá. Dejinfeté mësson ince ampolines, caresc y microfons che é gnüs adorá por la mëssa.

Orghelist bëgn, cors no
Pro les mësses pól ester le orghelist, mo nia cors y al vëgn aconsié da tó demez i libri dles oraziuns y vigni atra revista. Pro la Comuniun mëss le prou y chël che dëida partí fora se dejinfeté les mans y se vistí manëces. La oferta ne desson nia trá ite tratan mëssa, mo mëte sö contegnidus te posć adatá. Dötes chëstes regoles vel por les mësses mo ince por bati, nozes y sce al vëgn dé l'öre sant.

Informaziuns da taché fora
Olache an vá te dlijia mëssel gní taché fora les informaziuns plü importantes por i fedei. Lapró mëssel a vigni moda ester:
- le numer mascim de fedei che pó ite
- les desposiziuns sce an á borjú, sintoms da coies etc.
- la informaziun da tigní la destanza, les desposiziuns de igiena.

La Diozeja de Balsan/Porsenú aconsiëia inant da trasmëte les funziuns ince tres radio y evtl. internet  (pablo)