La Usc di Ladins

En colaboraziun danter i trëi Departimënc por la cultura de Daniel Alfreider, Philipp Achammer y Giuliano Vettorato él gnü lauré fora n pachet de mosöres por sostigní la cultura y l’ert te chësta secunda fasa dl coronavirus. Al se trata dla secunda pert dles mosöres de sostëgn por le monn dla cultura locala cun mosöres de n valur complessif de un n miliun de euro.

Sovenziuns cina 2.000
Chësc secundo pachet de mosöres culturales prevëiga n aumënt de aiüc preodüs cun la pröma mosöra. Al ne é nia debojëgn da fá mosöres de lege, porchël jará le pachet en forza atira. Le coordinamënt é pro le Departimënt por la cultura todëscia che metará a desposiziun ince les informaziuns por i artisć a na moda che les domandes podará gní presentades dal 25 de ma inant. I artisć freelance podará damané sovenziuns cina la soma de 2.000 euro.

Cultura y ert en presënza de publich
Al ti gnará dé ince l’oportunité ales artistes y ai artisć da mët da jí esibiziuns respetan les mosöres de proteziun cuntra le coronavirus. Al gnará metü en pe plataformes en colaboraziun cun organisaziuns culturales. “L’obietif é da colié les mosöres de sostëgn cun na seria de aziuns culturales”, spliga i assessurs Alfreider, Achammer y Vettorato che fej n apel da renforzé le contat danter publich y artisć, naturlamënter respetan les regoles preodüdes.

Creativité y cultura fej pert dl’economia
I trëi assessurs competënc sotrissëia che les formes de sostëgn por i artisć y les realtés culturales é öna dles priorités dl pachet de mosöres elaboré dala Junta provinziala. L’assessur por la cultura ladina Alfreider alza fora che “l’ativité culturala é fondamentala por nosta Provinzia  y che al é important da dé n impuls por podëi indô pié ia”. Ince por l’assessur Achammer é le sostëgn ala cultura fondamental por döta la sozieté.

La cultura y les sperses publiches
Le pachet de mosöres destiné al setur é gnü programé por trasmët l’importanza dla cultura adöm ai

• N miliun de euro por le pachet nü cun mosöres a bëgn de artistes y artisc (Foto: Unsplash)
•  

View the embedded image gallery online at:
https://www.lausc.it/atualite/12729-ipiunindosuedtirol-n-miliun-por-les-artistes-y-i-artisc#sigProId56fbab4083

artisć y les assoziaziuns. Adöm ales assoziaziuns Vereinigte Bühne Bozen, la Fondaziun Haydn, le Zënter cultural Euregio de Toblach, le cluster creatif Basis Vinschgau, l'Assoziaziun di auturs y dles auturies dl Südtirol, le zënter Astra y la Kunsthalle West - ma por nominé n per de organisaziuns - sarál l'obietif da ti dé zoruch ala cultura les sperses publiches che le coronavirus á tut demez. Al é preodü che da d’altonn dl 2020  artisć y rapresentanc dl monn dla leteratöra, dla musiga, dl teater y dl chino metará da jí esibiziuns sön döt le teritore dla provinzia.
“I orun mët da jí formac nüs por evënc culturai y invié la popolaziun da fá para por renforzé indô le lian danter la sozieté y le monn dla cultura”, dij l’assessur Vettorato.

Sostëgn concret
Le pröm pachet de mosöres é gnü aprové de merz cun sovenziuns por i artisć de 600 euro por garantí na pröma mosöra de aiüt asvelta y concreta. (Comunicat dla Ajentöra por la stampa de Südtirol)