La Usc di Ladins

Dai 19 de ma inant é le Museum Ladin indó davert. Baldi sará val’ salamënt dl’esposiziun permanënta stlüt al publich. An á por chësc orü tigní plü dí la "Trienala Ladina", mostra temporana te museum, che sará insciö da odëi cina ai 13 de setëmber 2020. Ara se trata de na mostra d’ert cun operes de artistes y artisć contemporans, che é gnüdes metüdes fora tl museum en gaujun dl proiet "Trienala Ladina 2019" dal titul "Le post é la lerch".
Chëra da sëgn é la sesta ediziun dla Trienala Ladina, concurs a chël che al pó tó pert dötes les artistes y artisć dles cinch valades ladines dles Dolomites, dl Ciantun Grijun dla Svizera y dl Friul, sciöche ince düc chi che se sint ladins y á n lian cun la storia, cultura o tradiziuns ladines. Les trëi davagnadësses y i dui davagnadus, Annatina Dermont, Yvonne Gienal, Karin Schmuck, Claus Soraperra e Tobias Tavella, á podü mëte fora sües operes tl museum. Lapró él ince gnü metü en mostra les operes de Michael Schrattenthaler, davagnadú dl Pest artistich "Richard Agreiter", evënt che vëgn tres tigní adöm cun la Trienala Ladina.
Le museum é davert dal mertesc ala sabeda dales 10:00 ales 16:00 y la domënia dales 14:00 ales 18:00.