La Usc di Ladins

La Junta regionala, rovada adöm ai 28 de ma 2020 tres videoconferënza á deliberé, danter l’ater, da sburlé ai 30 de jügn 2020 le termin por la presentaziun dles domandes de finanziamënt por iniziatives de promoziun y valorisaziun dles mendranzes linguistiches dla regiun, adöm cun d’atres desposiziuns che reverda la gestiun di finanziamënc regionai por l’ann 2020.
La delibera, portada dant dal assessur Manfred Vallazza, é gnüda aprovada fajon n’ezeziun ales desposiziuns dl Regolamënt d’esecuziun dla lege regionala 3/2018, a gauja dl’emergënza epidemiologica dl coronavirus.
La medema dezijiun é gnüda tuta, sön proposta dl assessur Giorgio Leonardi, por sposté ai 30 de jügn 2020 le terminn por la presentaziun dles domandes de finanziamënt tl setur dla promoziun dl’integraziun europeica de ativités particolares d’interes regional y tl setur di contribuc por la publicaziun de monografies, stüdi y operes d’interes regional.
Implü él gnü aprové les modalités de paiamënt di finanziamënc danfora conzedüs por l’emergënza epidemiologica dl Covid-19.  (Iaco Rigo)