La Usc di Ladins

Verjer al più prest l confin del Prener. L’é stat chel che à domanà i trei goernadores de l’Euregio: l president del Tirol Günther Platter, l president de la Provinzia de Trent Maurizio Fugatti e l president de la Provinzia de Busan Arno Kompatscher endèna na video conferenza en mercol ai 27 de mé. Duc trei d’acort sul besegn de garantir che posse passèr i auti travers l confin de Stat. »L’é na mesura nezessèra per ge dèr endodanef ai teritories de la Èlpes, aldidanché leé da n obietif comun, na concreta possibilità de davegnir.«

L’é stat na scontrèda virtuèla, chela de enstadì, enceben che l’era stat dezidù de se troèr de persona a Dìspruch, ma tant Fugatti che Kompatscher à renunzià per la tema de cogner passèr dapò 15 dis de carantena n’outa vegnui deretorn. Che l’é chel che ge tocassa ai turisć che volessa passèr sia vacanzes ti lesc del Sudtirol o del Trentin. Per chest fèr endò pontèr via la mobilità anter chisc teritories l’é de gran emportanza per l turism e per l’economìa del Trentin-Sudtirol. L’apel che l’é stat uzà fora dai trei goernadores l’é stat chel de orir l confin dant dai 15 de jugn a condizion che l’epidemìa reste sot control. Ti dis passé Platter se aea dit de contra proprio per i risesc che podessa ruèr da la Lombardia e dal rest del nord de la Tèlia.

L president Fugatti, fajan referiment a la declarazions de Platter, à sotlineà l fat che »l’Austria cognessa conscidrèr a na vida colaborativa la sinergìa con la Tèlia e nesc teritories e no la podessa serèr i confins a chesta vida.«


L'articol entriech l'é su la Usc nr 22 stampèda ai 5 de jugn  (MCI)