La Usc di Ladins

Ai 20 de jugn l’é la Dì internazionèla del refugià. La é stata pissèda de dezember del 2000 da l’Assemblea Generèla de l’ONU per recordèr l 50em cedean de la Convenzion del 1951 per l status di refugé e da enlouta la vegn zelebrèda te passa 100 Paìjes del mond.

Chesta giornèda, voluda per sensibilisèr su la condizion de passa 70 milions de persones che cogn lascèr sia tera, sia jent e dut che che i à per sciampèr da veres e persecuzions, l’à chest an amò maor segnificat, ajache l Covid-19, che à caujà gregn problemes te dut l mond, l’à portà conseguenzes amò piores per chi che cogn viver te n ciamp profugs, o sconet e zenza aer la segureza de na majon, na assistenza de basa e chel tant da soraviver.

L’UNHCR (o ACNUR, acronim de Aut Comissariat de la Nazions Unides per i Refugé) porta inant da egn la campagna #WithRefugees, che vel slarièr fora n messaje de solidarietà e inclujion, recordan che duc podon fèr la desferenza per fèr del mond n post più segur e solidal. »Na crisa desche chela per l Covid-19 – disc i raprejentanc de l’UNHCR - ne recorda che sion duc deboi e noscia forza l’é la solidarietà, ajache nesciugn é al segur se no sion duc al segur.«

Chest an la campagna #WithRefugees perveit desvalives apuntamenc virtuai che vel meter dant i refugé e sia stories, sia esperienzes e si talenc. Se pel troèr dut sul sit https://withrefugees.unhcr.it/.

En ocajion de chesta giornèda l’é pervedù anter l’auter la scontrèda »Oltre il Covid-19« endrezèda da »Mosaico – Azioni per i Rifugiati« en colaborazion con l’European Council on Refugees and Exiles (ECRE) e n Facebook Live endrezà ai 20 de jugn da les 11 da l’Unione Nazionale Italiana Rifugiati e Esuli – UNIRE, pruma sociazion nazionèla di rifugéte la Tèlia, dal titol »Pandemia, e non solo. L’eterna emergenza in cui vivono i rifugiati«, olache tolarà pèrt desvalives relatores, anter chisc ence Donata Borgonovo Re, dozenta de Derit de la Migrazions a l’Università de Trent.

Les é 19 la sociazions trentines, anter chestes Forum per la Pace e i Diritti Umani, Libera, Centro Astalli, Fondazione Comunità Solidale, Trentini nel Mondo, Cooperativa Villa Sant'Ignazio e Società Alpinistica Tridentina, che envìa a tor pèrt a la Dì internazionèla del refugià. L tem cernù tel Trentin per chesta dì l’é »Sciampeste o viajeste? Chiere mie davegnir, desche tu...« L program pea via doman ai 18 con »Poesie dal Campo« e l va inant ai 19 con »Notizie dalla Terra«. Ai 20 l’é l soul apuntament en prejenza, da les 6 da sera en via Belenzani a Trent e ai 21 se sera sù con »Memorie dal mare«. Program dal link: http://www.centroastallitrento.it/43-promuovere/giornate-mondiale-del-rifugiato/340-scappi-o-viaggi,-gmdr20


Su la Usc nr 24 stampèda ai 19 de jugn l'articol entriech e l'aprofondiment "Didamenc per i refugé"   (Lucia Gross)