La Usc di Ladins

A la fin del meis de mé ai sentadins di Comuns de Mazin, Sèn Jan, Soraga e Moena ge é stat dat l met de fèr i ejames sierologics del sanch per saer se i é vegnui a contat col coronavirus. Presciapech 2.500 persones se à scrit ite ai test paan l cost de 32 euro, te vèlch paìsc la perzentuèla é ruèda al 50% ma te etres l’é stat perzentuèles n muie più basses. I ombolc se aessa spetà na maor adejion vedù che da temp la jent domanèa de poder fèr n test fidabol per cognoscer la situazion sanitèra personèla e de duta la val.

Dapò chisc dis passé l’é stat endrezà da man de la Provinzia de Trent ence l test col tampon ma chest screening à abù amò manco partezipazion. Se stima che demò l 15% di sentadins l’aesse fat, enceben l’apel da man de l’aministrazions de comun de jir a l fèr, per rejons de sanità publica ma ence per la enrescida su l’epidemìa. 

La situazion te chest moment é miorèda debel, jà dal scomenz de chesta setemèna (amancol fin a mercol ai 17 de jugn canche aon manà en stampa l sfoi, ndr) te duta la val no se dombra più nience n malà de coronavirus. I numeres de l’Azienda Sanitèra disc che dal scomenz del contage te Fascia l’é stat 301 contagé e 19 morc da o per Covid. 

En lunesc ai 15 de jugn l president de la Provinzia de Trent Maurizio Fugatti à sotescrit na neva ordenanza con chela che l’à molà mingol la mesures de contegniment del contage. No l’é più de obligh se meter sù l couribocia a l’averta ma demò ti lesc publics seré, no ge vel più se meter la maneces canche se va a proveder ma seghitèr a igienisèr mans e carec. L’é stat confermà l’obligh de distanza de amancol un metro anter la persones ma no più anter jent che stèsc ensema ogne dì desche coleghes e familières.

Mesures e dac che ne deida vardèr inant con positività enceben che no cogn mai mencèr l sens de responsabilità. 


Su la Usc nr 24 stampèda ai 19 de jugn la posizions de Manuela Spinel e Gianluigi De Sirena  (Monica Cigolla)