La Usc di Ladins

La scola ie fineda, »y deguni ne se à ntendù,« da coche l ie unì scrit ti media raionei. Vëira iel che l ne n'ie nia stat, coche zënza, la festes de fin dl ann de scola, la bela mësses danora, tlapedes de mutans y mutons, jëunes y jëuni che jiva tres l luech biei cuntënc. L ne n'ie nia stat la gran cuntentëza per vester passei, la melcuntentëza per ne vester nia passei, ajache duc ie passei. La Ministra ëssa fat bon a cunedì chësc dl »duc passa« ala fin dl ann de scola, no bele de merz, ti dajan nscila na sburdla a vel' un o vel'autra a ne fé plu nia. Tan bel fóssel pa stat, sce la ëssa tenì la musa nchin a n vënderdi dl'ena passeda, per cunedì la bona nueva: ce cuntënc che duc fossa stac, do che veramënter duc se ëssa mpenià nchin ala fin.
Cun chësc iel pa bën mpo da dì che la stra-gran maiuranza dla sculées y di sculeies à fat pea a puntin la ncëries y i duvieres, da cësa demez. Na sort de nseniamënt che à cum­purtà n majer lëur che no chël de jì a scola, per i sculeies che nce per i nsenianc, y nce per i genitores che ie ora de nia sautei ite per fé i nse­nianc a cësa. Na bona iel stat che n à perfeziunà te do la rata puech tëmp la maniera de nsenië a destanza, duc à fat n gran var inant tl mane­jamënt di mesuns tecnics. N tel var ëssen scenó fat te plu ani. N se tol pea na auternativa mpurtanta per tëmps de crisa, ma nce tla relazion danter maester y sculé, dantaldut per la scoles plu autes. Danz che l à pesà dassënn l ijulamënt soziel, scialdi pesoch per nosc mutons, per nosc jëuni, deplù che per nëus plu de tëmp. Cie dì? - L ie unì laurà, tla tlasses plu basses àn mparà inant a dì »der« o »das«, tla scoles plu autes àn mparà a cunëscer Dante y Goethe, mé per fé ejëmpli, ajache gran pert dl program ie pa bën mpo unì tëut tres.
L ie stat n ann de scola ezeziunel: mo mei ne n'iel unì mparà tan truep te n ann de scola: a udëi ite tan bela che ie la normalità, tan beles che ie la pitla gran cosses dla vita. N nseniamënt per for!  (de David Lardschneider)