La Usc di Ladins

Le "coronavirus" s’á tles ultimes edemes apajé ia. La jënt á atira respognü y á ince metü man da la tó plü ala lisiria. Mascherot n pü’ cochessî, destanzes ince. I politics de Südtirol á te plü ocajiuns recordé che la pandemia n’é nia rovada, y ince fora por le monn odunse che regiuns olache al ê gnü smorjelé, vëgn indó sarades. Tl Südtirol án ince odü che i caji de porsones positives vëgn indó dant plü gonot, ci che an pó ince s’aspeté, cun la jënt che mët indó man da rodé y se moscedé. Na zifra indó dorata alta comunichëia l’Aziënda Sanitara dl Südtirol chësc lönesc ai 22 de jügn. Tles ultimes 24 ores án indó albü 11 caji positifs nüs, sön la zifra dorata bassa de 222 proes sön 117 porsones. I caji é düc gnüs pormez te öna na familia, olache na porsona infetada ê gnüda zoruch da n iade fora dal’Europa. Te ci comun che la familia é, odarán domisdé, canche l’Aziënda Sanitara mëna fora les tabeles. Chësc caje desmostra ince che cun le virus n’él nia da fá damat, y che al é inant da mëte averda.
I caji totai albüs te Südtirol crësc insciö a 2.633, les porsones varides é 2.252, che é trëi demanco co inier, les porsones mortes é 292 – numer che é por fortüna resté anfat.