La Usc di Ladins

Les modalités dl insegnamënt scolastich tl proscim ann de scora 2020/21 vëgn regolamenté tla Talia dal plann statal "Piano Scuola". Porvia dl coronavirus é chësta tematica de gran atualité. En vëndres ai 26 de jügn él gnü a s’l dé na incuntada virtuala dla conferënza Stat-Regiuns-Comuns (Conferenza unificata) danter i rapresentanc dles Regiuns y dles Provinzies autonomes, por baié dla proposta por l’ann de scora 2020/21.

Scomenciamënt ai 7 de setëmber – Zënza mascheroc
"Döt adöm sunse a öna cun la planificaziun dl Stat, mo i orun s’anuzé de nostes competënzes autonomes", á dit le presidënt dla Provinzia Arno Kompatscher. Les scores y les scolines dess insciö mëte man tl Südtirol ai 7 de setëmber. Le presidënt Kompatscher á ince sotligné, adöm cun i rapresentanc dles atres Regiuns y dl govern, da garantí "n insegnamënt zënza mascheroc". Al é gnü tut la dezijiun da regolamenté chësc aspet ala fin d’agost, ince aladó dla situaziun epidemiologica. La proposta da fá ince scora la sabeda vëgn tignida en conscidraziun.

Le dërt ala formaziun é fondamental 
L’assessur por la scora ladina Daniel Alfreider á sotlinié che ince por ci che reverda les scores y scolines ladines vëgnel lauré por arjigné ca döt por l’ann de scora che vëgn. "Nosc obietif é chël da scomencé regolarmënter cun l’insegnamënt te classa en presënza. Porchël laurunse fora dötaurela dötes les normes de segurëza che vá debojëgn, deboriada cun düc i interessá. La formaziun é n dërt fondamental por dötes les scolares y düc i scolars y al é nosc dovëi da garantí chësc dërt le plü inant che ara vá."

Trëi opziuns desvalies
Ince l’assessur por la scora todëscia Philipp Achammer sotliniëia che al é fondamental "da garantí le dërt al insegnamënt a scolares, scolars, jones y jogn. Porchël unse lauré fora n conzet che tol en conscidraziun trëi opziuns desvalies por le scomenciamënt dl ann de scora, por ester arjigná ca a vigni nezescité".

Garantí indó contac soziai
L’assessur por la scora taliana Giuliano Vettorato é ince a öna che "les mitans y i mituns adora indó le contat personal cun les insegnantes y i insegnanc y cun compagnes y compagns de classa. I un lauré cotan tles ultimes edemes adöm ince cun les atres Regiuns, por ti jí adicuntra ales esigënzes de formaziun de nostes mitans y de nüsc mituns."