"OK Mama, te chësc tëmp feji ci che i ó, dedó laurunse adöm!"

Data

25 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tl’ediziun atuala sunse rová ala 12ejima rubrica, ideada y metüda adöm vigni döes edemes dai pröms de forá 2020 incá dala esperta Maddalena Valentini de Badia. La rubrica á salpü da un n vers da informé y aconsié söl ciamp comples dla comunicaziun digitala moderna, y da cunté dl ater vers ince de n gran monn ascognü y datrai socret y prigorus iadó l’internet y nosc smartphone
L’important te nosc raport cun i stromënc dla tecnologia y la tecnologia instëssa é che i ne podun nia i maledí, mo i adoré cun cosciënza y conescënza por che ai nes dëides. Ai pó ester ütli y ince comoc sciöche les atres mascins, deache ai pó nes daidé sparagné tëmp, forza y scioldi. La dërta conescënza söi prighi che sighita nüsc dac y nosta vita privata, y la dërta mosöra tl’adoranza é döes rezetes valoroses.

Por stlü ia chësta rubrica interessanta che nes á acompagné chësta aisciöda cina sëgn, unse orü s’la cunté cun Maddalena Valentini de so comportamënt cun le monn digital y la comunicaziun moderna – ti ciaran dantadöt ala generaziun di mëndri y ales families cun mituns y jogn, olache le smartphone é deventé l’aparat plü adoré.

Maddalena, le smartphone alda aldedaincö pro nosta vita y te nosta ciasa. Él da te infora miú l’avëi co nia l’avëi?
"Por la porsona adulta dijessi insciö: sce te n’os nia l’avëi, ne vëighi nia ite ciodí che te messass l’avëi. N adult é tan inant da dí che al l’adora o nia, y da s’un avëi nia impormal sce i atri dij che al é ala vedla. Mo i diji ince che p.ej. WhatsApp pó ester dër ütla por comuniché, lascé al savëi val’ y s’la cunté, y ince por mené documënc y retrac. Por fortüna – insciö diji – viunse te n Stat olache al n’é nia scrit dant che vigni zitadin á da avëi n smartphone. I ún la liberté da l'adoré o manco."

Cai é pa da te infora i maius prighi sce i ún n smartphone y l’adorun?
"Plü che an vá söl digital, plü che al crësc ince le prigo che i dac röies te mans falades. Chiló stá gran pert dl prigo."
...
Ti désseste n smartphone a tü mituns che vá ala scora elementara?
"Iö á ciafé n telefon a 14 agn, nia denant! Mo i sá ince che aldedaincö ne poste nia plü aspeté tan di. Iö dijess che al é da ciaré da caje a caje a ci che é bun y ütl por le möt. Sce sü compagns á le smartphone bele a 8 agn y mi möt resta taié fora dala compagnia ma ajche al n’é l’á nia, pënsi sambëgn sura y ciari da ciafé n mesum por ti al dé. Sciöche geniturs messunse ciaré da odëi ite i tëmps y la situaziun, por acompagné spo le möt... Na rezeta podess ince ester chëra che geniturs y i mëndri mituns adora le smartphone deboriada, val’ ores al de. Al é da savëi ince ci contac soziai che le möt á, co che al se möi te scora, tl tëmp lëde y avisa söi socials. Dessigü él ri da dí a ci eté che n möt dess ciafé le smartphone, iö dijess: nia massa adora, mo gnanca massa tert."


Liéde deplü tla ediziun stampada o söl e-paper!

Söl retrat: Maddalena Valentini 

 (Iaco Rigo)