Al é prësc dui secui che la Romanistica é na sciënza y bele incër le 1900 án fat le pröm tentatif da trá adöm te na publicaziun n pü’ döt ci che an savô. Le resultat é sté le "Grundriss der romanischen Philologie" de Gustav Gröber, olache i maius esperc de vigni setur â trat adöm les conescënzes abinades sö cina iló. I dejenns dedó é spo stá ric de inrescides sön argomënc spezifics. Chisc é gnüs trac adöm n secundo iade ala fin di agn 1980–90 tl "Lexikon der Romanistichen Linguistik": indöt 8 volums che trata i lingac romanics – ince le ladin – sot i aspec plü desvalis.
Intratan á la romanistica indó fat de gran vari inant y an é insciö indó tl laur da cöie adöm chësc savëi, mo te na linia plü menüda, i "Manuals of Romance Linguistics": chësta linia á metü man cun i pröms dui volums tl 2014 y dess nen avëi ala fin incër otanta; ara é presënta te dötes les biblioteches scientifiches dl monn. Iniann él gnü fora le volum numera 26, che é por nosta menadranza de importanza particolara: ara se trata dl "Manuale di linguistica ladina", che se dá jö en particolar cun le ladin tl raiun dles Dolomites.
Editurs dla publicaziun é le prof. Paul Videsott y i inrescidus Ruth Videsott y Jan Casalicchio, che á cun l’aiüt de plü esperc fistidié da pité n volum che fej löm sön i aspec desvalis de nosc lingaz. Dedicada i al án a Lois Craffonara, che vëgn dötaorela araté un di maius esperc dl ladin.
Deplü sön la publicaziun ciafëise t’La Usc di 7 d’agost (pablo)
Le manual dla linguistica ladina
Da püch él danman le "Manuale di linguistica ladina", che é le 26. volum dla linia "Manuals of Romance Linguistics". Editurs é Paul Videsott, Ruth Videsott y Jan Casalicchio, y dediché ti al án a Lois Craffonara, che s’á dé jö na vita cun le ladin
Galaria retrac
View the embedded image gallery online at:
https://www.lausc.it/atualite/13251-le-manual-dla-linguistica-ladina#sigProIdb48a1dc3a3
https://www.lausc.it/atualite/13251-le-manual-dla-linguistica-ladina#sigProIdb48a1dc3a3