La Usc di Ladins

N cer’ sentimënt ára descedé la zifra: l’Aziënda Sanitara dl Südtirol á comuniché ai 20 d’agost che tles ultimes 24 ores án ciafé fora 21 caji nüs de "coronavirus", sön 1.137 proes che an á fat. L’ultim iade che an á albü tan de caji tl Südtirol é sté tla statistica di 24 d’aurí.

La maiú pert da foradecá
La maiú pert de chisc caji nüs vëgn indere da defora, sciöche l’Aziënda Sanitara spliga tl comunicat: "Pro 14 caji se tratera de porsones che é gnüdes te Südtirol da foradecá o che é gnüdes zoruch tl Südtirol, sciöche aiutanc tla racoiüda o jënt gnüda zoruch dala vacanza. Dui caji reverda porsones che é stades en contat cun d’atres bele infetades, 5 caji é gnüs a löm tres i screenings fac ti ospedai."

Degügn tla Ladinia
De chisc 21 caji nüs ne n’él gnanca un su ti comuns ladins. Les atres bunes noeles é che al n’é sté degügn morc lapró, y che le numer de porsones recoverades ti ospedai n’é nia jü söpert.

6 carantenes te Mareo
Chersciüdes é indere les carantenes, che é al momënt 1.846, de chëstes 334 porsones gnüdes zoruch dala Croazia, dala Grecia, Spagna o Malta. Por ci che reverda i comuns ladins, él tles ultimes 24 ores gnü pormez 6 carantenes tl comun de Mareo.  (pablo)