»Jerusalema«

Data

28 de agost 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I motifs dl suzes mondial de na ciantia tl lingaz venda
Che al é tres indó cianties che arjunj suzes a livel mondial n'é nia na noela, bëgn che la ciantia »Jerusalema« é scrita y ciantada te n lingaz de men­dran­za y á sciöche contignü n test religius, arátele cristian o ebraich, mo la cité de Ierusalem é indicativa por n post proieté tl cil, a vigni mani­ra dalunc dala soferënza y dala iniu­stizia söla tera: »Ierusalem é mia patria, mëneme iló, ví cun me, no me lascé chiló, mi daciasa n'é nia chiló, mi rëgn n'é nia chiló, sálveme!«
Le test de na ispiraziun tradizio­nala sterscia dl Spiritual fej la roda dl monn, sura les cultures y religiuns fora, sura düc i lingac fora. Ciantada é la ciantia tl lingaz venda (dla familia di lingac bantu),
View the embedded image gallery online at:
https://www.lausc.it/atualite/13375-jerusalema#sigProIdcb11630bab
baié ma da n miliun de porsones al confin N-O dl Süd­africa, cun la usc de morvëia de Nom­cebo Zikode. La ciantia é gnüda realisada y publicada dal musizist südafrican Kgaogelo Moagi, alias dj y produtur Master KG. La ciantia »Jerusalema« s'á deslarié fora cun la sbürla de TikTok y na »desfida« y »gara« ligherzina de bai y de coreo­grafies indlunch – datrai ince profe­sciona­les, datrai spontanes, spo ince religioses: patri y monians bala.
Cina inier ne savô le monn nia de Nomcebo Zikode, la ciantarina cun chësta usc bassa y brilanta, y tl video ofizial al song tan bela da emo­zioné por l'Africa, por na oraziun, por n bal che aspeta speranza y de mius tëmps.
Bunamënter stá chësta Ierusalem ince desco veícul y post imaginar che nes porta aiüt y sigurté te chisc tëmps dl viurs, che nes condüj fora dala gran stlüta de ciasa y paisc, y nes pita na »patria« y liberté nöia.
Scebëgn che tröpa jënt fora por le monn bala zënza sëns respetus y spiritual chësta ciantia »Jrusalema«, réstera impó na oraziun, al podess ester n salm modern che chërda y prëia Di do aiüt. Y al é n Di che stá sura döt le monn y sura döta la jënt, credënta o ateista. La ciantia arjunj universalité y n liam y na gran unité zënza confins, fora de n test che püc capësc, nasciü te un di pic dl monn manco conesciüs y te na Africa massa gonot desmentiada, sfrutada y maladorada. Chësta ciantia ti fej bun a düc por so ritm y söes usc, y ara vëgn balada y ciantada – te vigni verjiun – cun bona löna y amur por la vita y la creaziun. Ince ala religiun cristiana ti féjera bun, ara la scassa sö cun na oraziun nöia. Da speré él che ara ne vëgnes nia strumen­ta­lisada, no da fanatics de religiuns o ideologies de vigni vers no dai ebraics che vëiga tla cité reala de Ierusalem söa patria esclusiva.
La verjiun originala dla ciantia »Jerusalema« é gnüda ciariada sön Youtube ai 12 de dezëmber 2019, ai 25 d'agost 2020 ára bele registré feter 98 miliuns de vijiuns. Por n test te n lingaz de mendranza n prestisc. Y düc i atri pici lingac, sciöche ince le ladin, rengraziëia!  (de Iaco Rigo)

Galaria retrac

View the embedded image gallery online at:
https://www.lausc.it/atualite/13375-jerusalema#sigProIdcb11630bab