Scola deberieda

Data

04 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comentar de pruma
Scola deberieda: zeche che mo dan mez ann semiova vester zeche de normal. Scola vën fata for deberieda, l ie pu la definizion de scola che n se anconta te tlas, deberieda cun cumpanies y cun i nsenianc y la nseniantes. L normal de dan mez ann ie ntant deventà zeche de speziel, de bel: duc se ncunforta a jì inò a, o miec te scola, deberieda, cun legrëza. La legrëza che dantaldut i nsenianc dëssa dé inant. N ne daussa nia se lascé maië dala tëma, l ie stat drët a dsaré, dan mez ann, che n ne savova pu nia coche la fossa jita inant. Ma la va de ti lascé inò lerch al sentimënt de y per la realtà, de ne resté nia inant dunchei ite te tëma y panich, cossa che vën mo seneda massa suvënz ncantëur. La mesures de segurëza va dessegur bën, duc vëija ite che la va de se tenì pra l protocol, ma l bujën de cumenanza resta, l ie na rejon.
Per n valguni ie i mënsc dl lock down nce stac n mumënt per jì demez dal slune, de viver plu bel plan, de udëi ite la cosses mpurtantes dla vita. Ma trueps, y tlo dantaldut i mutons y i sculeies y studënc, à n pert patì dassënn. La scola a cësa ie stata pesocia, ajache pra l nsenia­mënt tóchel for la persona leprò, la cumenanza. L computer possa judé, coche dit, ma la digitalisazion ne possa nia vester che i sculeies stebe sentei ëures y ëures dan computer, scencajo ie l computer n mesun da nuzé cun mesura, cun fundamënt, cun na si finalità. Mé per dì a fé na nfrusceda, tueda y nrescida.
N à udù ite tan mpurtant che ie l cuntat danter sculé y maester, danter maester y sculé. L nseniamënt online possa jì bën datrai, ma la rejon de y per la furmazion de nosc mutons y de nosc jëuni, ie che la furmazion vënie dai nsenianc, te na situazion de cuntat, te scola, te tlas. L raport soziel ie fundamentel, nce cun i cumpanies.
Zeche che ti à pesà dassënn ai mutons y ai jëuni ie che i à udù, messù udëi ite, che l ie zachei che ti tol la lidëza, la libertà coche persona, coche grupa y coche cumenanza. Nëus plu vedli on udù l lock down nce coche na mesura »de zircumstanzia«, debujën per n struf. Nëus plu vedli son chersciui su tla lidëza, ndividuela y culetiva, coche cumpunënta mpurtanta y essenziela de nosc vester. I mutons y jëuni no: »big broher«, l gran fra cassù alauta, possa te dsaré via canche y coche l uel. Messon ti dé de reviers l sentimënt de lidëza ai jëuni: libertà y democrazia possa mé unì ora dal savëi, dala cum­petënzes che la scola possa y muessa ti dé inant.

Ntant ie na cossa segura, y chëla ie bela: jon inò duc a scola, te na scola deberieda!  (Comentar de David Lardschneider)

Galaria retrac