La Usc di Ladins

La Talia mëss mudé la lege litala por le Parlamënt, por la Ciamena y le Senat, ajache le numer di rapre­sentanc vëgn smendrí. Ci che al sozedará cun les regiuns y les pro­vinzies a statut spezial é da odëi, mo dessigü foss chësta lege na bona ocajiun por i Ladins da se lascé aldí. N cërtl lital por i Ladins dl Trentin – Südtirol, poscibilmënter adöm cun i Ladins da Suramunt, ti ga­ran­tiss n pü' plü valüta, unité y au­to­nomia ala mendranza ladina. Fá se lasciassel cun n pü' de bona orenté dal Stat y dales Regiuns, y sce i Ladins s'al damanass cun forzes unides. Na secunda chestiun reverda le reconescimënt y raforzamënt dl lingaz ladin tl'adoranza ofiziala, te scora y ti media. Dan val' dis unse lit tla stampa locala che le Parlamënt europeich á invié la Slovenia da re­co­nësce y ti dé plü valüta ai lingac de mendranza todësch, croat y serb, propi sön i ciamps che i á dit – ofizialité, scora y media. L'invit é bun y dërt. Conscidran la posiziun dl Ladin te chisc ciamps y fajon n confrunt numerich ince ma cun la mendranza todëscia tla Slovenia – 1.600 animes, cuntra 40.000 Ladins incër le Sela y ia en Ampëz – messas­son s'aodé le medemo invit dl Parlamënt europeich ala Talia, ales Regiuns Venet y Trentin – Südtirol y ales provinzies autonomes de Trënt y Balsan por i Ladins. Al é da speré che al röies a Strasburg ince na relaziun söla situaziun dl lingaz Ladin.  (de Carlo Willeit)