La Usc di Ladins

Sëgn nes sighita le coronavirus set mëisc alalungia (dai pröms de merz 2020 incá) y desche al pé nes mëtel indó tla smorza do che i ún podü trá le fle assá d'isté. Les previjiuns de na secunda gran ona de infeziuns y maratia te Europa vëgn reales!
Plan plan fóssel ora che dötes y düc se adatëies ala situaziun NIA normala che i viun te nosta cuotidia­neité y te chësta spana de epidemia, ajache i ne podun nia sciampé fora de chësc planët y dla storia. I ún podü intratan imparé che i messun vire cun chësc prigo che nes salta do y ados pornanche i ne metun nia averda, y pó nes atoché dër burt.
Dötaurela él jënt che crëi deplü a comploc y speculaziuns »dal alt« co al prigo de chësc virus, zënza ponsé n iade do ci che nos sun por­dërt sön chësc monn: i ne sun nia mascinns programades, i ne sun nia zënza fai, zënza defec, zënza deblëzes, zënza maraties, eterns! I sun y roma­gnun tres ciamó porsones, fates de osc y pel, i sun natöra che é gnüda, é chiló y vá. I osservun la natöra incër nos ia, les plantes, les eghes, i tiers, les aries... mo zacai de nos n'ó tres ciamó nia odëi ite che ai é natöra ince ëi. I ne sun nia deplü co la natöra, ince sce i aratun da ester datrai tan gaierc, sigüsc y gragn. La medema natöra, chëra che i sun düc nos sön chësta tera y tla vita terena, se amarëia tres indó, copa jö, mör instëssa ia, por gní fora indó nöia y sana. Al me toma ite Phönix, chël vicel mitologich che se desfej ala fin de sü dis por nasce indó danü fora de sü avanc o fora de so cënder.
Les plantes, i tiers, la jënt – al é anfat sce debli o rêsc (p.ej. Trump) – mëss tres indó passé tëmps de mara­ties y epi­demies, de coies y möries. A chësc ne ti sciampunse nia, gnanca cun i mius doturs y les mius mede­jines.
Cun les infeziuns tan massives de coronavirus incër nos ia, messunse plan plan düc se ausé da tigní ite plü respet por sconé almanco i atri, sce i ne orun bele nia nes sconé in­stësc! Al n'é por nia da se dessené, da se lascé sö, da se rebelé! Le plü d'öga por nosta sanité y por se stra­vardé da na infeziun (che pó ester debla mo ince sterscia) é tigní ite chës regoles che nes vëgn dades dant, te val' ocajiun valgamia rigo­roses y antiprodutives (!), te val' caje bëgn ma lesieres che ares ne se strënj gnanca pro les libertés da fá ci che i sun ausá o orun fá.
Al é jënt che se dessëna y se lascia sö, mo – insciö ponsâi zacan n de – cuntra che y ci pa? Cuntra nosta medema natöra?! I messun mefo n pü' mëte averda, mo i podun pa tres ciamó jí te n bar a bëre le café y man­gé na pizza, o jí a mëssa, o jí cinamai a pe y salté tla natöra, o jí en vacanza n per de dis te val' bel hotel! I podun acompagné i mituns ala scolina y a scora, y jí a cumpré ite val' bona ordöra y val' farina por i arjigné da sëra a düc te ciasa na bona cëna. Te ciasa n'á degügn bria da porté le mascherot... impó é jënt da orëi crou, impede da orëi bun!  (de Iaco Rigo)