La Usc di Ladins

Sölden (Tirol):dan da n ann parô le monn ciamó ti ritli, almanco por l'atlet de schi alpin Manfred Mölgg. Le slalom lerch söl dlaciá de Retten­bach ê söa 300ejima gara de Copa dl Monn. Dedó jô la sajun cochessí: de jená se fajô Manni me dassënn, al messâ dé tria, de forá deventâ le coronavirus protagonist ince tles gares di schi, a na manira che les Finales a Cortina söl program da mez merz gnô desdites.
Indoman y dodoman piará ia indó la Copa dl Monn, sciöche al é usanza: a Sölden, mo n'edema denant, por schivé les maius masses de schiadus söles nëis dl Ötztal. Les döes gares, n slalom lerch dles ëres (la sabeda) y un di ëi (le gigant di ëi) gnará portades fora zënza publich, ma cun i atlec sambëgn, sü tecnics y acompagnadus, y i jornalisć y fotografs y cameramen.
Cun 38 agn sará Manfred Mölgg dodoman al start, do che al é varí dal infortun y dij da se sintí bun söi schi. Le veteran marou é danter la desëna di azzurri al start.
Chësta sajun sará davëi extra, ince por les staziuns tl calënder de Copa dl Monn: al tomará fora les gares tl'America y ma öna sará na tapa nia europeica (y chësta ma por les ëres): a Yanqing tla Cina, nia dalunc da Pechin. I Mondiai sará dai 8 ai 21 de forá 2021 a Cortina te Ampëz, an odará te ci condiziuns de publich y libertés individuales por atletes y atlec.
Les gares a Sölden ciararunse en chësc ann ma tla televijiun, porchël aldiaran bunamënter – por le gran chit che sará tl parterre – la usc y le fle dles atletes y di atlec, al start, tratan les gares, tl travert.
Dles valades ladines saral da odëi en chësc ann blanch en aziun deplü atletes y deplü atlec: Nicol y Nadia Delago de Gherdëna, Stefano Gross de Fascia, Manfred Mölgg d'Al Plan, Alex Vinatzer de Gher­dëna y Hannes Zingerle da La Ila. Na curiosité söla diversité dles etés: canche Manfred Mölgg fajô söa pröma gara de Copa dl Monn ai 12 de jená 2003 â Alex Vinatzer 4 agn.  (de Iaco Rigo)