La Usc di Ladins

Incö ai 2 de dezëmber danmisdé á tigní sentada le grup de valutaziun dl zënter funzional provinzial tl’Agenzia de Proteziun Zivila dl Südtirol. Tla sentada él gnü fat fora da mëte söl livel de atenziun les autorités, les forzes dl ordin y de socurs, sciöche ince la popolaziun. Chësc deache an s’aspeta chisc dis de gran plöies y noveres. Tl Südtirol án bele le livel de atenziun "Alfa" por gauja dl Covid–19. Sëgn vëgnel ciamó lapró la "ona da d’invern" che dess atoché ince Südtirol.
Bele incö danmisdé ál metü man da novëi te plü posć, mo da en vëndres ai 4 de dezëmber inant vëgnel dit danfora cina a n meter de nëi tles munts. En chël de mëtel bele man adora da novëi da süd. Ia por le de él spo les prezipitaziuns che se sleria fora tres deplü y vëgn ince tres plü stersces. Le plü dî restel assöt te Puster. Les prezipitaziuns tignará bot ince en sabeda y en domënia, olache les maius cuantités tomará te Ulten, te Passeier, tl raiun dl Prener y tles Dolomites. Le livel dla nëi s’alzará n momënt y variará danter i 200 y i 1500 metri. En lönesc dess le tëmp mioré.

Evité da se mëte sön strada
Por via de chëstes previjiuns, él da en vëndres cina en lönesc valgamia prigorus por la nëi tles valades y ince les lovines. Al pó gní a s’l dé lovines, lëgns te strada, roes y roes, che pó porté a problems sön strada cun strades stlütes y ince a interuziuns dla forza eletrica", dij le diretur dl’Ajentöra de Proteziun Zivila Rudolf Pollinger. La popolaziun é porchël inviada da mëte averda y da evité da se mëte sön strada cun l’auto sce al ne mëss nia ester. A vigni moda desson avëi l’atrezadöra da d’invern, cun montli aladó y les morones.

Stede düc sagns!  (pablo)