La Usc di Ladins

Tratan la sentada di 23 de dezëmber á la Junta regionala aprové na morona de propostes cun danter l’ater ince na deliberaziun presentada dal assessur regional Manfred Vallazza che reverda les desposiziuns por la conzesciun de finanziamënc straordinars  porvia dl’emergënza sanitara Covid-19 ales istituziuns (dantadöt uniuns culturales) dles mendranzes linguistiches ladina, zimbra y mochena por la realisaziun de investimënc por la spana de tëmp 2021-23. Al se trata de n stromënt de sostëgn important al monn dl volontariat y dles uniuns te chësc momënt de dificolté lié ala pandemia dl coronavirus.
La Regiun á le fin da valorisé i grups de lingaz reconesciüs y da sostigní la diversité y la pluralité linguistica y culturala de döt le teritore en colaboraziun cun les Provinzies de Balsan y Trënt. Danter les spëises sostignides él la cumpra o la restauraziun de bëgns mobii, atrezadöres, aparac y sorvisc por l’atuaziun de ativités linguistiches y culturales de valorisaziun dles mendranzes linguistiches regionales y che ais na funziun de plü agn. Chësc reverda por ejëmpl la cumpra o la restauraziun de stromënc de musiga, de trohtes, de bandires, ornamënc o decoraziuns. Implü vëgnel sostigní por ejëmpl investimënc por cursc de formaziun y de ajornamënt por ci che reverda les competënzes nezesciares tl ciamp cultural.  
Por de plü informaziuns prëibel contaté l’Ofize Mendranzes linguistiches y la biblioteca dla Regiun Trentin – Südtirol, email: min@regione.taaa.it