La Usc di Ladins

La Junta provinziala de Südtirol cun a ce le presidënt Arno Kompatscher á fat fora insëra co jí inant te Südtirol cun les limitaziuns y restriziuns ti tëmps de Covid–19. Dodoman jöbia deventará la Provinzia "raiun ghel" y podará daurí sensibilmënter ativités che é al momënt stlütes.
Les scores altes dauriará les portes por le 75% de leziun cun presënza fisica.
La maiú pert dles botëghes podará indó daurí.
I bars y les ostaries ará indó davert cina les 18:00, restoranc cinamai cina dales 22:00, sce al vëgn tigní ite les prescriziuns de prenotaziun.
Les restriziuns ó che i ghesć stais pro mësa y che al sides pro mësa ma cina alplü cater ghesć.
Ince les üties da munt podará daurí, la stlüta cuotidiana é indere scrita dant por les 16:00, chël ó dí "degun après-ski".
Aladó de informaziuns ofiziales da Roma, podará les pistes dai schi y i implanc daurí süa ativité cun i 18 de jená 2021 – chësta prescriziun valará ince por Südtirol. Aladó dl Govern a Roma ne pó les porsones dla Talia nia se möie lëdiamënter fora dles provinzies resp. regiuns, cina ai 15 de jená 2021.

Incö él da s’aspeté l’Ordinanza nöia dl pres. Kompatscher, che dess spo baié tler cina tl detai!  (Iaco Rigo)