Al é dui mëisc che i studënc dles scores altes fej scora dan da n monitor. Cun i 7 de jená pói finalmënter indô pié ia a scora. Por ci che reverda la scora ladina, nen vára de 395 scolares y scolars che pó indô fá leziuns en presënza. Chëstes gnará pitades tla mosöra dl 75%. Sambëgn sarál da tigní ite regoles de precauziun, sciöche la dejinfeziun o ince le mascherot tresfora. Lapró él preodü da monitoré la situaziun, en colaboraziun strënta danter les Intendënzes, Direziuns de scora y Aziënda Sanitara. Chësc gnará fat cun tesć antigenics regolars por insegnanc y por studënc – düc sön basa volontara.
Potenzié la mobilitéUn di gragn problems por daurí les scores ê dantadöt
le tru da jí a scora: ó dí le trasport di scolars che ê gonot suraciarié y porchël fontana por le slariamënt dl virus. L’assessur ala mobilité Daniel Alfreider á splighé che por desgropé le problem á la Provinzia fistidié da organisé dan y do scora 180 corieres implü, che fajará indöt 380 iadi surapró. De chisc é cotanc propi dedicá ma al trasport scolastich. La capazité dl trasport publich é limitada al 50%, sön les corieres dedicades ma ai scolars (cuntrasegnades cun na "s") crëscera al 80%. Sön le sít www.suedtirolmobil.info o www.suedtirolmubilta.info y sön la app dla mobilité pón odëi düc i orars atuai. "Por garantí che le tru da scora sides le plü sigü che ara vá, vál debojëgn che düc se tëgnes ales regoles", á splighé Alfreider, che á invié ala colaboraziun da pert de düc, tignon sö le mascherot, tignon les destanzes, mo ince aspetan le secundo bus, canche le pröm é bele plëgn.
Les dificoltés cun la didatica a destanzaChe la didatica a destanza n’á nia la miú faziun, vëgn ince desmostré tres na inrescida danter i adolescënc fata da "Save the Children Ipsos" y gnüda fora rodunt incö ai 5 de jená: le 28% dij che almanco un de sü compagns de classa á lascé daldöt da frecuenté les leziuns online, le 35% dij che süa preparaziun scolastica é gnüda piec, le 38% dij che la didatica a destanza é na esperiënza negativa. Gaujes é la dificolté da se conzentré pro les leziuns online, scioöche ince i problems tecnics por la conesciun internet. Ince porchël á l’assessur Achammer alzé fora che les leziuns en presënza n’é nia ma importantes por arjunje damí i traverc formatifs, mo ince por la sanité psichica di jonins.
(pablo)