La Usc di Ladins

Endèna che se speta de saer vèlch de segur sul scomenz de la sajon dai schi, Fascia pel se confortèr con trei dates che é enveze più che segures: 26, 27 e 28 de firé, canche sun Sèn Pelegrin, sul portoi La VolatA vegnarà fat trei gares de eles de Copa del Mond. Trei gares ajache l’é la neva proprio de chisc dis, che apede a cheles de libera e de SuperG anulèdes a Yanqing te la Cina, rua te Fascia ence l SuperG anulà de dezember a Sèn Moritz.

L Comitat de endrez é stat metù ensema e l’é al lurier per chest gran event. L’Azienda per l Turism de Fascia sarà en pruma linea e la metarà a la leta persones e ressorses percheche chest apuntament garatee al miec. A cef del Comitat l’é Andrea Weiss, diretor de l’Apt de Fascia, vize president l’é Davide Moser, fort de sia esperienza passèda con l’endrez di Mondiai Junior 2019, raprejentant del Comun de Moena. Apede a ic l’é Tiziano Mellarini president del Comitat Trentin de la FISI, Leonardo Bernard president del Ski Team Fascia en raprejentanza ence de la sozietèdes sportives Monti Pallidi e FassActive e Renzo Minella diretor de la sozietà de impianc portamont de Sèn Pelegrin. L secretar general, coordenador de dut l’endrez, l’é Cristoforo Debertol.

»La setemana de proe e de gare sarà dai 23 ai 28 de firé - à dit l president Weiss - en lunesc passà l’é stat n soralech sun Sèn Pelegrin per dezider la logistica per dut l’aspet leà a la comunicazion tras televijion e reclam con l responsabol Cristoforo.

Sion contenc de chest apuntament con le gare de ele percheche te chest moment l’é la Nazionala più forta, le ne fasc far bela fegura e le raprejenta ben noscia Federazion. Le é n muie aprijiade e le dasc spetacol, n muie de jent ge varde a le gare per televijion.

Sarà donca na proa emportanta chela che aon tedant, na vedrina de valuta del schi te Fascia, fazile no podaron aer l publich ma aron l met de jir fora te passa 50 nazion en direta per trei dis. Cognaron se dar jù duc chenc per far bela fegura e vardar de star ite te chest calandar de Copa del Mond, se preferir con nosc endrez a na vida che i cerne endò de vegnir chiò, no demò per scuerjer i bujes de valgugn de autres. L lurier l’é gran ma sion segures che podon far ben.«  (Monica Cigolla)