La Usc di Ladins

Le lockdown te Südtirol vá inant "por n iade cina ai 14 de merz". Chësc é gnü comuniché dal presidënt dla Provinzia de Südtirol Arno Kompatscher, te na conferënza stampa en mercui ai 24 de forá. Chësc ó dí che por les proscimes döes edemes valarál inant les mosöres de restriziun che i conesciun: an podará ma arbandoné l’abitaziun por rajuns de laur, sanité o chestiuns de prescia; al é proibí da ester alaleria dales anter les 8 da sëra y les 5 da doman;  le comerz (cun les ezeziuns sciöche zënza) y la gastronomia resta inant stlüc.
Cina ai 14 de merz resta tla didatica a destanza ince les scores mesanes, scores altes y universités. Na buna noela él altamo por i mëndri y sü geniturs: cun en lönesc al 1. de merz podará chi dla elementara indô jí a scora, i mëndri podará jí a scolina y i plü pici podará gní mená ala Ciasa di Pici.
Por i 14 de merz ciararán co che la situaziun se svilupëia, á splighé Kompatscher. Por chi comuns olache al é gnü a löm ince la varianta südafricana dl virus, velel inant regoles ciamó plü strëntes. Le presidënt dla Provinzia á splighé che sce chësta varianta gnará a löm ince te d’atri comuns, o sce al ess da ester te cer’ comuns n numer particolarmënter alt de infeziuns, se resservëion da tó provedimënc plü stersc ince dailó.


 (pablo)