La Usc di Ladins

Pordërt ái programé da ennier encá te cösta lerch da fá en comont ana­litich y critich sön l'ann de pan­demia che nos y döt le monn á passé (tal mal y tal bun), mo spo m'á ot encö da doman na tele­fona­da dal ciant­autur y ostí Ale­xander Mutsch­lechner alias Ale­xan­der Dal Plan sön en ater tru. Lapró vën d'atri fac, caji o coinzi­donzes: ennier do­misdé ái fora d'en sarënch odü rodenn a Al Plan Georg Cristofolini (dal Hotel) a pe con la chitara söle spiné (desco ai tomps da laota), y ensëra ái lit en post enformatif FB de Chris Costa (Chri­stian Pescosta) da Cor­vara/Milan co baia de 22 agn de »Valbadia Jazz Festival« y che »...al se röia chiló, i odarun ci che le dagní nes portará«.
Dan 30 agn ênse nos trec (jont aldedancö de mesa eté) te na stöa a Al Plan, con les chitares sön banch da furn, che i metên adöm lies y programs de conzerc, ciances, regi­stra­ziuns... con idealism artistich, anarchism jonil y – a vigne maniera – gran vëia do poscibilités y presënza por dí fo­ra val', »a cösc monn tan comot y superfizial, tan materia­listich, tan engor­dio, tan egoistich y consu­mistich«. Y sën, do düc i agn che i án podü lauré, se spazé encërch y se realisé zacó, odunse en­dó enzai na chitara. Mo, c'él pa pordërt müdé? Él ma sté cösc virus co nes á müdé, o ánse avisa mancia te cösta sozieté tan produtiva chël »möt te nos«, o la ciancia d'amur y dai pici vicí tles »aisciödes«... al vën dit che la porsona co variëia ennant con le ce tai nii toma tosc t'en büsc, mo sën é ince d'atri »t'en büsc« y forsc nes consolëia, ralegrëia y motivëia avisa na chitara y na ciancia enzai cassö tai nii...
Püri artisć y ciantauturs (ladins y te döt le monn) chisc mënsc dla gran slüta, püra ert y cultura! Scebën che trec artisć ess sën dlaurela assá da trá a tera val' de nö, cherié, for­mé... ai é a tera zonza forza y speran­za! Cia­run da i daidé, vignönn de nos te söes poscibilités y funziuns, a ce de val' uniun y istituziun! Le »Valbadia Jazz Festi­val« aranse mancia, y ti manciará ala jont, nosta jont y i ghesć, canche i cafés y les üces de munt ará endó les portes davertes... en bel de, al gnará! La speranza é l'ultima a morí – vëgnel dit, y encö da doman vën fora d'en aiet cösc telefonat de Ale­xan­der Dal Plan, co mo dij con en pü' de ligrëza che al á fat ultimamon­ter ciances y á sën feter slüt jö le laur de registra­ziun por toc nös y na produziun de CD nea, söa usc sona desco le pröm calander te chës brüsces sora bosch: bun y bel! Al é na usc co dij che la vita vá ennant, sce i án festidi o nia, sce i portun en gran pëis tai ponsiers o tai senti­monc, sce i sun zonza laur y com­pagns, sce la net é endó en iade massa lungia... Y sën s'ánse ince spo che i ne viun nia ma de pan, mo d'en gröm de »alimonc« a chi che la sozieté y la gran politica ne ti dá nia atenziun y priorité. Ci va­lü­ta che val' á, odunse datrai massa tert, y sce i en­jö­mun la ferata, ne junse engnó. Ciarun da ester söle iade, ince sën... ince sce »ma« tai nii!  (de Iaco Rigo)