Turism e ambient, envers na transizion

Data

02 de merz 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L besegn de n mudament de prospetiva per l davegnir de la vita e l’economìa di raions da mont l’é stat argoment ti ultimes tempes de desvaliva scontrèdes, momenc de confront e webinar sul web.


L setor turistich da d’invern de la valèdes ladines l’é stat ciapà ite da na fona crisa economica. Per colpa de l’emergenza sanitèra chest an i impianc portamont i é resté seré con conseguenzes negatives per duta la comunitèdes che vif per la maor pèrt su l’industria del schi. 

Te chisc meisc aboncont se à tacà amò più che dant a rejonèr de la situazion atuèla e del davegnir de l’economia de noscia valèdes da mont del Trentin-Sudtirol e Venet, se à tacà a se domanèr se se podarà amò viver desche dant, se l’é giust seghitèr a spener ite demò te n setor e donca fèr sù neves impianc portamont. Tel debatit atuèl se rejona de ‘transizion’, che fossa l passaje da na vijion del turism descheche l’aon vivuda nos e pojèda sul schi da d’invern a na vijion olache troe lèrga ence etres projec, no alternatives, ma ‘complementères’ al schi da d’invern.

De chest argoment l’é stat rejonà ence te un di webinar che la Fondazion Dolomites Unesco à endrezà dal meis de dezember en cà su Facebook. Ai 25 de jené l tem proponet con la diretora de la Fondazion Marcella Morandini (che chisc dis l’à lascià sia encèria che l’aea portà inant dal 2013) l’era apontin chel del prejent e del davegnir de la stazions del schi te la Èlpes, descoret te n debatit rich de stimoi anter la professora del Departiment de Scienzes del Politecnich de Torin Federica Corrado, l diretor de Confindustria Belun Dolomites Andrea Ferrazzi e l president e aministrador de La Sportiva Lorenzo Delladio, con la moderazion del giornalist Gianbattista Zampieri.

L webinar à abù gran suzess e n muie de comenc, i argoments traté i era fersc e i à tocià dal vif noscia valèdes. Se pel amò l veder su la piata Facebook de Dolomites Unesco al link: https://m.facebook.com/story.php?story_fbid=123991712907131&id=1430132387239378&sfnsn=scwspwa

 L contegnù del debatit, con la posizions en curt di intervegnui, é da poder lejer su La Usc stampèda de vender ai 26 de firé.  (Valentina Redolfi)