La Usc di Ladins

La pruma outa l era stat de mé del an passà, e l era stat conscidrà n moment storich: n Consei provinzièl dut dedicà a la mendranzes linguistiches, endrezà aldò del articol 27 del Statut de autonomia su spenta de l’avocata Katia Vasselai, presidenta de l’Autorità per la mendranzes linguistiches de la Provinzia de Trent, organism encardinà apontin tel Consei provinzièl, de chel che fèsc pèrt ence i doi raprejentanc de mochegn e zimbres, respetivamenter Chiara Pallaoro e Matteo Nicolussi Castellan.

Te chela ocajion dut l Consei a una aea aproà de enciarièr l President del Consei provinzièl a mudèr l regolament del Consei medemo per poder meter a calandèr na sentèda spezièla de Consei su la mendranzes vigni an, iter che é stat envià via te la legislatura passèda dal president del Consei Walter Kaswalder adum col Conseier provinzièl ladin Luca Guglielmi e do la litazions del uton passà dal president de ades Claudio Soini.

Apontin Soini à avert donca con sodesfazion la sentèda del Consei dedichèda a la mendranzes en mèrtesc ai 19 de november, col rengraziament per la bona colaborazion a l’Autorità per la mendranzes e a si trei componenc, ma ence ai etres raprejentanc de la mendranzes prejenc, per la comunanza de Fascia l vizeprocurador Renato Nazario Micheluzzi, e al publich, che tolea ite ence vèlch clas de scolees. L President del Consei à rejonà de politiches per la mendranzes che cogn passenèr coi conzec de Libertà e Autonomia, sotrissan l’emportanza che la Provinzia seghite a stravardèr la comunanzes ladina, mochena e zimbra. 

De più su La Usc stampèda de en vender ai 22 de november.  (Lucia Gross)