Sci l ie vëira, 280.000 euro zirca ie na gran soma, ma sambën ne vëniel cun chisc scioldi nia mé cumedà su chël pitl tòch de tretuar da udëi sun la foto dlongia la lëtra de Herbert Prinoth, publicheda te La Usc dl 24 de auril 2020.
N ie jic sun l post a se cialé ju dut cun persones de cumpetënza y n se à rendù cont che la sbalia plu de gros. L'ega à slavatà ora la tiera sot ai petons, fajan arsì la streda y n ie ruvei ala contlujion che n muessa fé zeche sciche l toca, dantladut sce n cunscidra che al didancuei muessa la stredes tenì nce de gran pëisc. Per fé i lëures che ie de bujën, sun 44 metri de streda y no sun 25 metri coche nunzià da Herbert, iel unit ora plu o manco chisc custimënc:
- zaré ju y giavé 42.000 € za.
- parëi de peton per tenì su mesa la streda 26.000 € za.
- mures de peton, mur de sasc, ijulazion 46.000 € za.
- roles, pozzetti, salieries y asfalt 24.000 € za.
- sieves, ëur de sasc y lumes 26.000 € za.
Leprò vën mo la spëises per la segurëza dl cantier, na soma per lëures nia udui danora (sce de bujën), la spëises tecniches y l'iva. Dut adum móntel ora zirca 280.000 €. L parëi de peton sprizà (parete chiodata, Nagelwand) féjen per tenì su mesa la streda ntan i lëures, per garantì che i zitadins da Sacun posse for passé su y ju, davia che chësta ie la sëula streda per arjonjer chësc ridl. Spiegan dut chësc al cunsëi, àn udù ite l bujën de l fé y perchël ie l proiet unì azetà. Chësc ie ntant un di cater tòc dla streda da Sacun, che n à ntenzion de cumedé su. Che i custimënc ie auc ne pòssen nia strité ju y chësc vel n generel per i lëures publics, ma chësc depënd truep dala regules y cundizions metudes dant, a chëles che l Chemun muessa se tenì avisa, ma che ne n'ie segurdenó unides metudes su da chëi che l manejea śën.
(Rudi Kostner, assessëur dl Chemun de Urtijëi) 
