La Usc di Ladins

Al é dui mëisc y mez sëgn che les scores é gnüdes stlütes, y le bilanz é dër negatif chiló da nos. Nüsc mituns á pordü n tëmp important. Cuaji dötes, nia dötes, les maestres chiló La Ila n'á nia fat la DAD – didatica a destanza – sciöche al tocass... Ciodí che mené ma compic, zënza videoleziuns, almanco un n iade al'edema, n'é nia insigné! A chësta manira sunse nos geniturs gnüs alzá de livel – sce an pó dí insciö – a livel de maestri, ma zënza »busta paga«.
Cun chësc oressi fá n apel ala Direturia dles Scores Elementares dl'Alta Badia y a düc chi che á la poscibilité da daidé: düc nüsc mituns dess de setëmber indó podëi jí zoruch a scora!
Scomencede da lauré sëgn por arjigné les strotöres dles scores, por che scolars y maestri pois indó scomencé la scora, y se sintí sigüsc zënza che mec tomes fora... Y sce al n'é nia lerch unse de gran palestres, lerch alaleria, o de vigni sort de strotöres, al basta madër la bona orenté – sce i jun do ales diretives de nosta Ministra dla Educaziun L. Azzolina, che á fat na proposta miserabla, ridicula y »razista«, ne röion ignó.
De setëmber ó, y dess, düc i mituns dles scores ladines indó podëi jí a scora! Basta cun chësta DAD che ne funzionëia nia!  (Silvina Begleiter Agreiter, La Ila)