La Usc di Ladins

Chësc virus á sëgn archité döt y se fajará pié ia da zero. Al s'é gnü dé na ocajiun: i ún la poscibilité da analisé sce la strategia politica turistica portada inant cina sëgn sides chëra che i adorun y orun, o sce i podesson chirí na alternativa che sides plü dlungia a nosta situaziun. Chësc é le dër momënt por chirí na resposta!
Le turism piará ia bel plan, naota söl marcé talian y dedó sön i atri a destanza cörta. Chësc virus nes sforza da definí danü nüsc obietifs y nosc stil de vita dala pert soziala, ambientala y economica. Al pó ester che, por mirit dla carantena, él valgügn che á descurí valurs y á porvé da vire te na manira por ël nia usuala. Iö crëii che canche döt piará indó ia, sarunse te n pröm momënt contënc che i turisć gnará indó te nosta valada, y i argomënc dl trafich, dl surafolamënt y dla sconanza dl ambiënt tomará indó al secundo post. Tl pröm sarunse ince contënc cun le turism de passaje, olache i turisć, a gauja dla crisa economica, passará te nosta valada zënza spëne demassa. Sperun che döt se sistemëies y che an pois jí zoruch ala normalité, ince sce al ne sozedará nia da incö a indoman. Messun trá fora le miú da chësc momënt por ponsé y programé nostes ativités te na manira plü sostenibla por nosta comunité. La domanda é: Ci sort de turism orunse pa por nosta valada? De ci vers orunse pa jí?
Metun averda ai segnai dl marcé, ince sce ai é al momënt debli, por ester arjigná y agí te na manira inovativa y responsabla ai cambia­mënc y i odëi spo sciöche oportunité. Al é le dër momënt por programé y ciaré al dagní!
Iö sun dla minunga che le setur turistich, indespensabl por le bëgnester de nos düc, pëia indó ia por mirit de nostes carateristiches: flessibilité, inovaziun, vijiun por le dagní y bona vëia da se dé da fá. I ne podun nia stlü i ödli, mo i messun se damané sëgn te ci manira che i orun i dé le bëgnodü ai tröc turisć che aprijëia tan nosta tera. Le turism se dará indó les sodesfaziuns a chëres che i sun ausá, y deboriada despassarunse ia ince chësc tëmp manco saurí!  (Manfred Canins, Badia)