La Usc di Ladins

Ulësse cuntribuì ala nutizia dla prima fòssa mussulmana sun curtina de Urtijëi cun n pitl »curiosum«. Son stat truep ani de mi vita te paejes cun maiuranza de crëidum islamich, danter l auter tla Siria, tl Iraq, tl Iran y tl Yemen. Te chël tëmp me éi nce dat ju cun la religion de chëi raions y da ntlëuta incà sei mo mpue' la rujeneda araba. Assé per capì l senificat dla scrita dessëura dla fòssa tl'atenzion mediatica. Coche cumpanies de rujneda dl'oma me à mo n iede cunfermà, uel la scrita (cun vel' fal de ortografia) dì: »L ne n'ie degun Die ora de Allah.« Chësta frasa ie tl Islam cunesciuda coche »Scuhada«, y coche testemunianza dl crëidum vëniela tëuta ca per cunvertì i miscredënc: chiche la dij trëi iedesc dan doi testemo­nesc devënta mussulman. Sambën iel la lidëza de uni persona, de se crì nstës ora la paroles cun chëles che l vën lecurdà. Tan bën cunësci de n auter cont nce l Corann, a savëi che l se ëssa nce pità na scrita manco cunfruntativa. For tenian cont de vester sun na curtina ulache duc i autri defonc ne crëia nia a Allah. Chësc coche pitla nfurmazion sëuraprò da mi pert, cun chëla che uniun possa se pensé la sia.  (Lukas Pitscheider, Urtijëi)