La Usc di Ladins

A pajina 19 de La Usc nr. 23 de i 12 de śugno 2020, l é una intervista da Fascia. Sote el titolo »L marcià de la cèses dò l coronavirus« ciato un mescedon de pensiere e de paroles. Da ra esperienzes che ón fato cà in Anpezo el »marcià de la cèses/imobiliar« (seconda e terza domanda) l é una roba ben diversa da ra »vocazion turistica« (cuarta domanda) e res no và mescedades. »Turista« l é ci che va a spaso o se móe par se stravià, par curiosità o par cultura, una òta cà una òta là in śiro par el mondo a vede luoghe nóe, che drome in afito e magna agnó che mai. Chel inveze che se cronpa un cuartier o una ciaśa el nó n é pì gnanche una fré »turista« de chel posto; el deènta paron de un pestuzo de i nostre paese, el vien a ciaśa sóa canche el vó e con ci che el vó e mangare el pratende chesto e chel. Par ejenpio: se ió vado calche dì a Berlin, a Praga o in Toscana son un »turista« senza un cuartier inze chi luoghe. Ma canche m'in vado »con baraca e buratis« par alcuante dis a stà inze el mè cuartier a Torbole o a Caorle nó son pì un »turista«, me tramudo inze una de ra mè ciaśes, magno e dormo là. E alora el »marcià imobiliar turistich« (dorà par responde a ra cuarta domanda) che ciato scrito inze La Usc l é un modo de dì – e de fei e de pensà – che no esiste. Ce ve salo?  (Sisto Menardi Diornista da Ronco de Anpezo)