Con chesta doi paroles volesse rengraziar de cher l'Union di Ladins e l Grop da Moena per la bela scontrada che lunesc ai 6 de messal i à volù endrezar sa Zen, japede l Ciaslir. Te chesta ocajion é abù l'onor e l piajer de salutar tenc amisc e paconc, compagnes de tanta batalies e de trop lurier fat dessema da passa 40 egn en cà al ben de noscia comunanza ladina: na scì belota festa, sentuda fin te la pel daìte, dalonc da ogne sòrt de formalità, no aesse mai podù me augurar, e chest me repaa ence de tanta fadìes e duc i despiajeres de chisc ultimes tempes. A la dir duta, ge tegnìe proprio a serar sù mie percors profescional dessema co l'Union di Ladins e l Grop da Moena, percheche l'é tel gremen del Moviment Ladin che é fat i
prumes varesc te l'empegn politich e cultural, fin dai prumes egn '70, canche l'era pech e nia a la leta, e dut ge volea se vadagnar a forza de struscies e scinternamenc. Enlouta l'é stat per merit de l'Union di Ladins che l'é nasciù l'Istitut, e te l'Istitut son ruà per volontà de l'Union, aciò che te chela istituzion vegne lurà per i Ladins, no de contra. Chest mandat é semper tegnù te dant dai eies, te duc chisc egn, e spere ence de l'aer onorà, per chel che é podù. Rengrazie donca dant da dut l president Fernando e l president onorarie Tone Pollam per aer recordà chest tant e per aer volù spartir chest pensier tant coi veies militanc che coi joegn, che a despet di tempes e del vent che tira de rebuf seghita a lurar con legreza e gaissa per nosc lengaz e cultura. Me à fat piajer veder ruar da dalonc ence la presidenta de l'Union Generela Milva Mussner, dessema co la jona presidenta de l'Union di Ladins de Gherdena: rengrazie l'una e l'autra ence per la bela paroles che les me à dit e scrit privatamenter. N detalpai bon fort per l pensier, per la paroles de salut publichèdes su La USC e per sia prejenza ence a Roland Verra, intendent emerit de la Scoles Ladines de Busan, con chel che per egn aon compartì idees, projec, temes e aspirazions. Te chest contest voi rengraziar ence Elsa Zardini e Denni Dorigo, che i é vegnui de persona a me sporjer so salut a inom de l'Istitut ladin Cesa de Jan e de la Union di Ladins de Souramont, segn concret de la volontà de
tegnir strenc i leames te anter la valèdes ladines. E coscita ence Erika Castlunger e Leander Moroder, presidenta e diretor de l'Istitut ladin Micurà de Rü, che me à manà de bela paroles, tel segn de na vejinanza de sentiment e de amicizia che va ben sorafora i raporc de colaborazion istituzionala. Me à fat piajer ence lejer su la USC l lonch intervent de Erwin Valentini, che à recordà i egn del projet SPELL, fosc »mingol vagà« a n dir de zachei, ma ampò nasciù dal besegn de ge dar n fondament de unità al popul ladin a l'auteza di tempes.
Son stat content de lejer sui sfoes ence l comunicat dat fora dal Consei de la Neva UAL che con sia referenta Cristina Donei à volù recordar e recognoscer i varesc de n percors, lonch e tormentà, che à portà noscia mendranza ladina a aer te man i strumenc per varentar lengaz e identità, co la speranza che sun chest troi posse seghitar a jir inant ence la neva generazions.
Te chesta ocajion rengrazie se sà ben ence duc chi che me à manà de persona n pensier de salut via email o fb, tant da dalonc che da vejin, a scomenzar dai amisc de la Comiscion Culturala, del Comitat de redazion de Mondo Ladino e del staff de l'Istitut, persones de gran valor uman e profescional che me à sostegnù tel lurier per duc chisc egn, dessema a tenc colaboradores che dassen fossa massa lonch nominar un per un.
Da n ùltima, dulcis in fundo, n devalpai de cher a la canzelistes de l'Union per aer endrezà la scontrada a na vida tant gustegola e sorida, con paroles e pensieres dalbon ciarié de segnificat, olache l don più gran l'é stat chel de binar tanta jent sinziera, moeta da sentimenc de amicizia vera, a scomenzar da Maria e Davide, che con sia musega e co la ousc de Angela no i podea me far n regal più gran, zenza desmentiar Robby Dax e Enrico T., compagnes de n'autra aventura musicala (da la Grenz al Brasil), e a duc i etres che à volù tor part de persona o che se à unì a la bela compagnìa col spirit e col pensier.
Ai 7 de messal 2020, con recognoscenza
(Fabio Chiocchetti del Goti) 
